Aqtóbede memtapsyrys alyp otyrǵan jeke mektep balalarynyń oqýlyǵy áli túgel emes

Elimizdegi eń úlken mektepte qazir oqýlyq tapshy. Munda memlekettik tapsyryspen bilim alatyn 3700 oqýshynyń 1415-inde áli kúnge deıin oqýlyq jıyntyǵy túgel emes, dep habarlaıdy QazAqparat tilshisi.

Aqtóbeniń Batys-2 shaǵyn aýdanynda ornalasqan jańa mektep bıyl ǵana qoldanysqa berildi. Munda 3700 bala bilim alady. Barlyǵy memlekettik tapsyrys aıasynda oqyp júr. Alaıda arada aıǵa jýyq ýaqyt ótkenimen oqýlyq máselesi áli sheshilgen joq.

«Nemerem 5-synypqa barady. Alǵashqy aptada oqýlyq bolmady. Keıin 5 oqýlyq berdi. Keshe ǵana Jaratylystaný pániniń kitabyn ákeldi. Áli kúnge deıin Qazaq tili, Ádebıeti sekildi pánderdiń oqýlyǵy joq. Telefonnan qarap oqýǵa da bolady. Biraq bul óte yńǵaısyz. Zeıin qoımaıdy, shala daıyndalady sabaqqa», dedi ata-ana Zakııa Asanqyzy.

Bul jaǵdaıdan Aqtóbe qalalyq bilim bólimi habardar.

«Bıyl 183 myń bala orta mektepte oqyp júr. Onyń 173 myńy memlekettik mektepte. Qazirgi kezde memlekettik bilim ordasynda oqıtyn balalardyń bárinde oqýlyq bar. Sonymen birge ádebı kitaptar da satyp alyndy. Al «Smart bilim» mektebine keler bolsaq, bul jekemenshik. Qazirgi kezde balalardy túgel oqýlyqpen qamtý suraǵy qarastyrylyp jatyr. Munda 3700 bala oqyp jatyr. Onyń ishinde 2200 balada oqýlyq bar. 1415 balada oqýlyq jıyndyǵy tolyq emes. Qazir mektep basshylyǵy naqty sany men oqýlyq túrin anyqtap, baspahanamen kelisedi. Aı ishinde suraq sheshiledi»,- dedi Aqtóbe oblystyq Bilim basqarmasynyń bólim basshysy Lıazzat Ordabaeva.

Aıta keteıik, jeke mektep oqýshylarynyń bári memlekettik tapsyrys aıasynda bilim alyp júr. Memleketten bastaýysh synyptyń ár oqýshysyna jylyna 445 myń, 5-9 synyp oqýshylaryna 605 000, 10-11 synyp oqýshylaryna 721 000 teńge qarastyrylǵan.