Aqtóbede memlekettik satyp alýlar basqarmasynyń basshysy taǵaıyndaldy
AQTÓBE. KAZINFORM - Memlekettik satyp alýlar basqarmasy basshysynyń qyzmetin Qaırat Qýantaıuly atqarady. Búginge deıin ol Aqtóbe qalasy ákiminiń orynbasary boldy.
Aqtóbe oblystyq memlekettik satyp alýlar basqarmasynyń jańa basshysy Qaırat Qýantaıuly oblys aktıvine tanystyryldy. Jańa basshyǵa memlekettik satyp alý rásimderiniń ashyqtyǵy men tıimdiligin qamtamasyz etý, bıýdjet qarajatyn utymdy paıdalaný jáne memlekettik satyp alý salasyndaǵy jumysty jetildirýge qatysty birqatar mindet júkteldi.
Qaırat Qýantaıuly 2004 jyly S.Báıishev atyndaǵy Aqtóbe ýnıversıtetin halyqaralyq ekonomıka mamandyǵy boıynsha, 2018 jyly Qazaq-orys halyqaralyq ýnıversıtetin quqyqtaný mamandyǵy boıynsha támamdaǵan. Eńbek jolyn 2004 jyly S. Báıishev atyndaǵy Aqtóbe ýnıversıtetiniń ekonomıka jáne basqarý kafedrasynyń oqytýshysy bolyp bastaǵan.
- Eńbek jolynyń basym bóliginde Aqtóbe qalasynyń kásipkerlik, ekonomıka jáne qarjy, sondaı-aq memlekettik satyp alý salalaryndaǵy bólimderinde qyzmet atqarǵan. 2021–2023 jyldary Hromtaý aýdany ákiminiń orynbasary qyzmetin atqardy. 2023 jyldyń jeltoqsan aıynan bastap Aqtóbe qalasy ákiminiń orynbasary bolyp jumys istep keldi. Al buǵan deıin memlekettik satyp alýlar basqarmasynyń basshysy qyzmetin atqarǵan Amangúl Qarataeva ókilettik merziminiń aıaqtalýyna baılanysty oblys ákimi apparaty basshysynyń orynbasary laýazymyna taǵaıyndaldy,- dep habarlady Aqtóbe oblysy ákiminiń baspasóz qyzmeti.
Buǵan deıin Aqtóbede eki basqarmaǵa jańa basshysy taǵaıyndaldy. Oblystyq mádenıet, arhıvter jáne qujattama basqarmasynyń basshysy qyzmetin Medet Ysqaqov atqarady. Al oblystyq ekonomıka jáne bıýdjettik josparlaý basqarmasyn Adaıbek Esenamanov basqarady.
