Aqtóbede memlekettik kirister basqarmasynyń bólim basshysy para alǵany úshin sottaldy
AQTÓBE. KAZINFORM — Hromtaý aýdandyq memlekettik kirister basqarmasynyń bólim basshysy kásipkerdiń 30-dan astam ákimshilik hattamasyn jasyryp, tek úsheýin toltyrǵan. Sóıtip aıyppul kólemin qysqartyp, ózi para aldy.
Hromtaý aýdandyq memlekettik kirister basqarmasynyń bólim basshysyna Qylmystyq kodekstiń «Para alý» baby boıynsha aıyp taǵyldy.
Іs materıalyna qaraǵanda, byltyr ınertti materıaldar daıyndap, satýmen aınalysatyn «GaryshBeton» JShS-ne ákimshilik shara qoldanyp, shot-faktýrany ýaqytyly tapsyrmaǵany úshin eskertý beredi. Biraq kompanııa eskertýdi elemeı, sol jyly qaıta buzýshylyq jasaıdy. Bıyl aqpan aıynda ákimshilik jaýapqa tartý jóninde sheshim shyǵaryldy. Naýryz aıynda kompanııa basshysy aýdandyq memlekettik kirister basqarmasyna baryp, bólim basshysyna jolyǵady. Áńgime barysynda Ákimshilik quqyqbuzýshylyq týraly kodekstiń 280-1 baby 4 bóligimen jaýapqa tartylatynyn aıtady. Aıyppul kólemi 2 249 000 teńgege jetken. Ár buzýshylyq faktisine 86 500 teńge esepteledi.
Sot kabınetindegi aqparatqa súıensek, kompanııa basshysy aıyppuldyń kólemin estip, abdyrap qalǵan. Sol sátte Hromtaý aýdandyq memlekettik kirister basqarmasynyń bólim basshysy aıyppul kólemin qysqartyp bere alatynyn aıtyp, sendiredi. Tek úsh ákimshilik hattamamen shektelýi úshin 500 000 teńge para suraıdy. Kompanııa basshysy bas tartar bolsa aıyppul kólemi artatynyn uǵynyp, kelispen. Sóıtip 2026 jyldyń naýryz aıynda tek 259 500 teńge aıyppul arqalap, tóleıdi.
Hromtaý aýdandyq memlekettik kirister basqarmasynyń bólim basshysynyń zańsyz áreketin uqqan kompanııa basshysy bıyl mamyr aıynda Aqtóbe oblystyq UQKD baryp, aryz jazady. Bólim basshysy qyzmettik kóligimen júrip, para alǵan jáne aqshany óz qajettilikterine jumsap jibergen. Sotta sottalýshy ózine taǵylǵan aıypty moıyndap, keshirim surady. Ol 30-dan astam hattamanyń ornyna tek úsheýin ǵana toltyrǵan, zańsyzdyqqa jol bergenin aıtty.
Sot úkimimen E.Farhad Qylmystyq kodekstiń 366-baby 2-bóligimen aıypty dep tanylyp, 15 000 000 teńge aıyppul salyndy. Sottalýshy memlekettik qyzmet salasynda jumys isteý quqyǵynan ómir boıyna aıyryldy.
Aıta keteıik, basshysyn para berýge kóndirgen aqtóbeliktiń isi sotqa tústi. Jeke kompanııa basshysy qyzmetkerine aldanǵanyn túsingen kezde ony ustap berdi. Sottalýshy alǵashynda 100 mln, keıin 50 mln teńge para berýge kóndirgen.
