Aqtóbede memlekettik qyzmetshilerdiń ústeme jumysqa tartylǵany anyqtaldy
AQTÓBE. KAZINFORM – QR Memlekettik qyzmet isteri agenttigi Aqtóbe oblysy boıynsha departamenti jyl basynan beri 25 memlekettik organǵa monıtorıng júrgizdi. Onda 20 memlekettik qyzmetshiniń ústeme jumysqa zańsyz tartylǵany anyqtyldy.
QR Memlekettik qyzmet isteri agenttigi Aqtóbe oblysy boıynsha departamenti memlekettik qyzmetshiniń quqyǵyn qorǵaý maqsatyna baqylaý jumysyn únemi júrgizip otyrady. Eldegi zańnama aıasynda memlekettik qyzmetshi de ústeme jumysqa tartylady. Biraq bári zań aıasynda rettelýi tıis.
- Tótenshe jaǵdaı jáne shuǵyl kómekti qospaǵanda memlekettik qyzmetshi kelisim bergende ǵana ústeme jumysqa tartylady. Zań boıynsha júkti kelinshekter men múgedektigi bar adamdar ústeme jumystan bosatylǵan. Al ózgesi eseptelgen ústeme jumys ýaqyty táýligine 2, aıyna 12, jylyna 120 saǵattan aspaýy tıis. Talap boıynsha olarǵa tynyǵý ýaqyty beriledi nemese1,5 saǵattyq mólsherlemede aqy tólenedi. Osy talaptardyń saqtalýy úshin turaqty monıtorıng júredi. Jyl basynan bastap 25 mekemede baqylaý boldy. Onda 20 memlekettik qyzmetshiniń zańsyz ústeme jumysqa tartylǵany anyqtaldy. Negizi aldyn ala akti toltyrylýy tıis. Akt bolmaǵan soń mekeme basshylaryna eskertip, olarǵa tynyǵý saǵattary berildi. Jaǵdaı Hromtaý aýdany ákimi apparaty, Aqtóbe oblystyq ekonomıka jáne bıýdjetti josparlaý basqarmasy, oblystyq bilim basqarmasynda tirkeldi. Birinshi ret tirkelse eskertý berilip, qaıtalansa, aıyppul qarastyrylǵan. Bizde aıyppul kezdespedi, - dedi QR Memlekettik qyzmet isteri agenttigi Aqtóbe oblystyq departamentiniń bas mamany Gúlhan Sısenbına.
Aıta keteıik, memlekettik qyzmetshiler úshin ıkemdi jumys kestesi qarastyrylǵan. Balabaqshaǵa, mektepke bala tasymaldaý úshin keıbiri aldyn ala habar berip, ruqsat alady. Byltyr mundaı jumys kestesin 68 memlekettik qyzmetshi qoldandy.
- Memlekettik qyzmetshi aldyn ala ótinish jazyp, ıkemdi jumys kestesin suraıdy. Esesine túski úzilis qysqarady, jumystyń bastalýy nemese aıaqtalý ýaqyty uzartylady. Talap boıynsha 8 saǵat jumys isteıdi, - dedi Gúlhan Sısenbına.
