Aqtóbede memlekettik qyzmetshiler arasynda sport túrlerinen jarys ótti

NUR-SULTAN. QazAqparat - QR Tuńǵysh Prezıdenti kúni qarsańynda aqtóbe oblysynyń 500-den astam memlekettik qyzmetshisi sporttyń 6 túrinen jarysqa tústi. Olardyń qatarynda shaǵyn fýtbol, voleıbol, sýda júzý, ústel tennısi, toǵyzqumalaq, shahmat sııaqty sport túrleri bar, dep habarlaıdy óńirlik ákimdiktiń baspasóz qyzmeti.

Memlekettik qyzmetshiler arasyndaǵy mundaı spartakıada dástúrli túrde ótkiziledi jáne memlekettik oǵan qatysýǵa jyl saıyn qyzyǵýshylyq artyp keledi. Oıyndar óte tartysty ótti jáne ár sport túri boıynsha jeńimpazdardy anyqtaý uıymdastyrýshylar úshin qıyn boldy.

Oblystyq spartakıada atalǵan meıramǵa arnaıy uıymdastyrylyp otyr. Sebebi Elbasymyz ózi de turaqty túrde sportpen shuǵyldanady jáne turǵyndardyń sportpen shuǵyldanýy úshin jaǵdaı jasalýyna tapsyrmalar berdi.

Spartakıadanyń jabylý saltanatynda jeńimpazdarǵa dıplomdar men kýboktar tabystaldy. Sonymen qatar, bıylǵy jyldyń jańalyǵy retinde úzdik komandalar men oıynshylarǵa memlekettik qyzmetshilerdiń salalyq kásipodaq uıymy atynan aqshalaı syılyqtar tabys etildi.

Jalpykomandalyq esepte spartakıada jeńimpazy bolyp 87 upaımen Temir aýdany ákimdiginiń qurama komandasy anyqtaldy, ekinshi oryndy 79 upaımen Aqtóbe qalasy Almaty aýdany ákimdiginiń quramasy, úshinshi oryndy 71 upaımen Aqtóbe oblysy ákimdiginiń quramasy ıemdendi.

Eń qyzyqtysy, úzdik tanylǵan memlekettik qyzmetshiler utyp alǵan qarjylaryn biraýyzdan qaıyrymdylyqqa jumsaý týraly sheshim qabyldap, az qamtylǵan otbasylardyń balalaryna kıim-keshek pen azyq-túlik alýǵa jumsady.

Úzdikter qatarynda ústel tennısinen Almaty aýdany ákimi apparatynyń sektor meńgerýshisi Qanat Mamaev, shahmattan Temir aýdandyq bilim, dene shynyqtyrý jáne sport bóliminiń bas mamany Erlan Ospaǵambetov, júzýden Aqtóbe oblysy dene shynyqtyrý jáne sport basqarmasynyń basshysy Evgenıı Goncharov, toǵyzqumalaqtan Baıǵanın aýdanynyń memlekettik kirister basqarmasynyń bas mamany Roza Qanı bar.

Memlekettik qyzmet isteri jónindegi oblystyq departamenttiń aqparaty boıynsha búgingi kúnde oblystyń memlekettik qyzmetshileriniń 50%-dan astamy sportpen belsendi túrde aınalysýda.