Aqtóbede memlekettik qyzmetker kásipkerdi soqqyǵa jyqty
AQTÓBE. QazAqparat – Aqtóbede memlekettik qyzmetker kásipkerdi urǵan. Oqıǵa Qobda aýdanynda boldy, dep habarlaıdy QazAqparat tilshisi.
Karaokege barǵan memlekettik qyzmetker aqy tóleýden bas tartyp, kásipkerge qol jumsaǵan. Qazir ol aýrýhanada jatyr.
«Oqıǵa 24 qyrkúıekten 25 qyrkúıekke qaraǵan túni boldy. Sol kúni adam kóp bolǵan joq. Ózim bárin monıtordan qarap, qaýpsizdikti baqylap otyramyn. Kelýshilerdiń biri aqy tólemeımin dep eseptesýden bas tartty. Ózderin salyq organynanmyz dep tanystyrdy. Іshke kirip, kameradan qarasam bireýi esik aldynda dáret syndyryp tur. Qoǵamdyq orynda bul qylyqtary uıat emes pe? Eskertý jasaǵanda balaǵat sózder aıtylyp, urys boldy. Sóıtip turǵanda ekinshisi oqys kelip, judyryǵymen bir urdy. Eseńgirip qaldym. Olar kólikke minip ketip qalǵan, biz polıtsııa shaqyrdyq. Urysqan kezde ózderine arnap ústel jaıý kerek ekenin aıtty. Kelesi kúni úıge, aýrýhanana kelip keshirim surady», - dedi kásipker Shynar Qamıeva.
Qobda aýdandyq memlekettik kirister bóliminiń basshysy Bolat Jekeevtiń aıtýynsha, kúdikti bolǵan T.Ámirǵalıev pen D. Báımen sol kúni on jylǵa jýyq ýaqyt jumys istegen qyzmetterinen óz erikterimen shyǵyp ketken.
«24 qyrkúıek kúni Qobda aýdanynyń ortalyǵynda dámhana meńgerýshisi men turǵynnyń arasy kelispeýshilik boldy. Turǵyn dámhana ákimshisin bir ret betinen urǵan. Qazir osy derek boıynsha Qylmystyq kodekstiń 293-baby, ıaǵnı, buzaqylyq boıynsha tergeý júrip jatyr», - dedi oblystyq PD baspasóz qyzmetiniń jetekshisi Erbolat Sarqulov.
