Aqtóbede memlekettik qoryqqa zańsyz kirgen top ishinde prokýror men sýdıa bar
AQTÓBE. QazAqparat – Aqtóbede «Yrǵyz-Torǵaı» memlekettik tabıǵı rezervatyna zańsyz kirgen top anyqtaldy. Olardyń arasynda sýdıa, prokýror bar, dep habarlaıdy QazAqparat tilshisi.
«6-qańtar kúni Aqtóbe oblystyq sotyna Aqtóbe oblystyq orman sharýashylyǵy jáne janýarlar dúnıesi aýmaqtyq ınspekııasynan Yrǵyz aýdany, Nura aýyldyq okrýginiń «Aqman» memlekettik qoryǵynyń kúzetiletin aýmaǵyna ruqsatsyz kirgen adamdardy ustaý týraly habarlama kelip tústi. Olardyń ishinde Yrǵyz aýdandyq sotynyń tóraǵasy Baqytjan Erlan da kórsetilgen. Qazirgi ýaqytta atalǵan derek boıynsha qyzmettik tekserý júrgizilýde», - dedi oblystyq sottyń baspasóz qyzmetkeri Anar Aıtjanova.
Aıta keteıik, Aqtóbe oblystyq prokýratýrasy aýdan prokýrory Aıdos Saǵyndyqovqa qatysty qyzmettik tekserý bastalǵanyn málimdedi.
«3-qańtar kúni Aqtóbe oblystyq orman sharýashylyǵy jáne janýarlar dúnıesi aýmaqtyq ınspektsııasy erekshe qorǵalatyn aýmaqta bolǵan topty anyqtady. Olardyń arasynda Yrǵyz aýdandyq prokýrory Aıdos Saǵyndyqov bar. Osy derek boıynsha Ákimshilik quqyqbuzýshylyq týraly kodekstiń «Jeke tulǵalardyń erekshe qorǵalatyn tabıǵı aýmaqtardyń jekelegen túrlerinde bolý tártibin buzý» baby boıynsha jaýapqa tartyldy. Oǵan 2 AEK kóleminde aıyppul salyndy. Aıdos Saǵyndyqovtan eshqandaı balyq tabylmady. Qyzmettik tekserý bastaldy. Tártiptik jaýapqa tartylady»,- dedi Aqtóbe oblystyq prokýrorynyń kómekshisi Órken Eşanov.
