Aqtóbede memlekettik baǵdarlama aıasynda salynǵan turǵyn úılerdiń sapasy tekserildi

«Nur Otan» partııasynyń qalalyq fılıaly janyndaǵy partııalyq baqylaý komıssııasy «Nur Aqtóbe» turǵyn úı alabynda salynyp jatqan qurylys nysandaryna baqylaý júrgizdi. Qazirgi tańda bul turǵyn úı alabynda 9 qabatty eki turǵyn úıdiń qurylysy aıaqtalǵan. Taǵy bir kóp qabatty turǵyn úı jeltoqsan aıyna deıin paıdalanýǵa berilmek. Al №10 turǵyn úı mańyna kógaldandyrý, abattandyrý jumystary júrgizilýde. 123 páterli №9 turǵyn úıdiń qurylysyn «Norıs ı K» JShS-i júrgizgen. Joba quny — 1,6 mıllıard teńge.

«Nur Aqtóbe» shaǵyn aýdanyndaǵy №23 jáne №9 turǵyn úıler ýaqytyly tapsyrylady. Qurylys materıaldary der kezinde jetkizildi. Qazir árleý jumysy júrip jatyr. Nysandy jyldyń sońyna deıin tapsyramyz», - dedi «Norıs ı K» JShS-niń ýchaske basshysy Abıbolla Jumaǵalıev.

Aqtóbe qalalyq qurylys bólimi basshysynyń mindetin atqarýshy Aslan Jarasbaevtyń aıtýynsha, bul shaǵyn aýdanda ótken jyly 1352 adamǵa páter berilgen. Bıyl 6 kópqabatty turǵyn úıdiń 5-i, 11 az qabatty úıdiń 8-i tapsyrylady. Qurylysy aıaqtalatyn 13 úıde 1632 páter ornalasqan. Sonymen birge 71 az qamtylǵan kópbalaly otbasyna «Nurly jer» baǵdarlamasy boıynsha respýblıkalyq bıýdjet esebinen páter satyp alý josparlanyp otyr. Qazir oǵan konkýrs jarııalanǵan.

«Komıssııa músheleri «Nurly jer» baǵdarlamasy aıasynda «Nur Aqtóbe-4» turǵyn úı alabynda salynyp jatqan úılerdiń sapasyn qarady. Qazirgi tańda «Nur Aqtóbe-1» turǵyn úı alabynda 11 az qabatty turǵyn úı, al «Nur Aqtóbe-4» turǵyn úı alabynda kóp qabatty 4 úı salynyp jatyr. Eń qýanyshtysy - jyl sońyna deıin báriniń qurylysy aıaqtalady. Jyl sońyna deıin 365 otbasyǵa páter kilti tapsyrylady dep josparlanýda. Úıler eki jylǵa deıin kepildikte bolady. Eger páterdiń sapasyna qatysty qandaı da bir másele týyndasa, olqylyq ketse, merdiger uıymdar óz qarjysy esebinen jóndeıdi», - deıdi «Nur Otan» partııasynyń Aqtóbe qalalyq fılıaly tóraǵasynyń birinshi orynbasary Nurlybek Júsipov.