Aqtóbede memlekettik baǵdarlama arqyly berilgen turǵyn úıdiń shatyrynan sý ketti

Aqtóbe qalasyndaǵy «Batys-2» aýdanynda memlekettik baǵdarlama boıynsha birneshe turǵyn úı paıdalanýǵa berildi. 1 jeltoqsanda Aqtóbe oblysynyń ákimi Berdibek Saparbaev qalalyq turǵyn úı qoryn esepke alý sektorynda tizimde turǵan memlekettik qyzmetker, bıýdjettik mekeme jumysshylary men áskerılerge turǵyn úı páterleriniń kiltin tabys etken bolatyn.

Arada 8 aı ótkende qurylystan aqaý tabyldy.

«Páterdi ótken jyldyń jeltoqsan aıynda «Qazaqstan ıpotekalyq kompanııasy» ıpotekalyq uıymy arqyly 20 jylǵa nesıege aldym. Aı saıyn 55 myń teńge tólep otyrmyn. Eki bólmeli páterdi alý úshin qalalyq turǵyn úı qoryn esepke alý sektoryna baryp, kezekke turdym. Bıýdjettik mekeme qyzmetkeri retinde aldym. Páterde 8 aıdan beri turamyn. Jańbyr jaýǵan kezde tóbemizden sý aqpaıtyn edi. Búgin tańerten jumysqa ketip, balalarym úıde qaldy. Jańbyr jaýyp, páterdi sý alǵanda edendegi jaıýdy jınap, tósekti alyp úlgermegen. Tek balalar dalaǵa shyǵyp ketken. Sýdy keship júrmiz. Qurylys kompanııasy men qalalyq ákimdik qyzmetkerleri kelip, shyǵyndy óteıtinderin aıtty»,- dedi turǵyn Qundyz Ermekbaeva.


Qurylysty salǵan «Soleres» kompanııasy barlyq shyǵyndy ózderi óteýge ýáde berdi. Páterge olar jóndeý jumystaryn júrgizip beredi, búgingen, isten shyqqan turmystyq tehnıkalardy jańartady.

«Shatyrda sýaǵarlar bar. Qubyrlardyń birikken tusy durys bekitilmegen, sodan keıin synyp ketken. Biz óz qateligimizdi kórip, jaýapkershilikti óz mindetimizge alamyz. Páterlerdiń ishine sý tolǵanyn kórip, olarǵa shyǵyndy óteýge kelisim berdik. Jóndeý júrgizemiz, tehnıkasyn jańartamyz. Eki kúnde shatyrdaǵy qubyrlar jańartylady, keıin páterde jóndeý jumystaryn bastaımyz»,- qurylys kompanııasynyń ókili Erlan Tájiǵulov.

Aıta keteıik, «Batys-2» aýdanyndaǵy 6 qabatty turǵyn úıdiń shatyrynan aqqan sý 1 qabatqa deıin jetken. Qurylys kompanııasy aldymen shatyrdy jóndep, sý bolǵan páterlerdi keptiredi, jóndeıdi.