Aqtóbede memleket paıdasyna 1,3 mlrd teńgeden astam qarajat óndirildi
ASTANA. KAZINFORM — Aqtóbede memlekettik satyp alý kezinde zańbuzýshylyqtar anyqtaldy.
Aqtóbe qalasynyń prokýratýrasy memlekettik satyp alý týraly zańnamanyń saqtalýyn tekserý barysynda memlekettik múddelerge zııan keltirgen buzýshylyqtardy anyqtady.
Belgili bolǵandaı, tapsyrys berýshiler qalalyq ınfraqurylymdyq jobalar boıynsha sharttyq mindettemelerdi oryndamaǵan josyqsyz merdigerlerden sharttardy qamtamasyz etý somasyn jáne avanstyq tólemderdi óndirý jóninde sharalar qabyldamaǵan.
— Sonymen qatar, lızıngtik kompanııamen qalany abattandyrý úshin arnaıy tehnıka satyp alýǵa arnalǵan shartty oryndaý sheńberinde 556 mıllıon teńgeden astam somaǵa bıýdjettik qarajatty artyq tóleýge jol berilip, keıin ol tolyǵymen bıýdjetke qaıtaryldy. Nátıjeleri boıynsha memleket paıdasyna 1,3 mlrd teńgeden astam óndirildi. Kináli laýazymdy tulǵalar tártiptik jaýapkershilikke tartyldy, — delingen habarlamada.
Jalpy bıylǵy jyldyń 9 aıynda oblys prokýratýrasy bıýdjetke 10,1 mlrd teńge óndirip alýdy qamtamasyz etti.
Buǵan deıin Aqtóbede quny 1,7 mlrd teńgeden asatyn jer ýchaskeleri memleketke qaıtarylǵanyn jazdyq.
