Aqtóbede memleket qaıratkeri Nurlan Balǵymbaevqa eskertkish taqta ornatyldy

Qazaqstannyń munaı-gaz salasynyń damýyna bar ómirin arnaǵan Nurlan Balǵymbaev Aqtóbede bas ınjener bolyp jumys istedi. Búgin ózi jumys istegen ǵımaratqa eskertkish taqta qoıyldy. Munaı jáne gaz ken oryndaryn ıgerý jónindegi ǵylymı zertteý ınstıtýty qabyrǵasyndaǵy eskertkishti ashýǵa marqum N.Balǵymbaevtyń baýyry men oblys ákimi Berdibek Saparbaev qatysty.

«Jaqsynyń jaqsylyǵyn aıt, nury tasysyn» degen sóz bar. El úshin, ult úshin eńbek etken azamattardy esh ýaqytta umytpaýymyz kerek. Solardyń biri - Nurlan Ótepuly. Keńes Úkimeti kezinde mınıstrlikte jumys istegen qazaqtan shyqqan azamattar az. Nurlan Ótepuly Máskeýde munaı-gaz salasynda jumys istep, shetelde oqyp, «Shevron» kompanııasynda eńbek etti. Mınıstr qıyn kezde Premer-Mınıstr qyzmetin atqardy. Ol halyqtyń ál-aýqatyn arttyrý úshin úlken eńbek etti», - dedi oblys ákimi Berdibek Saparbaev. Óńir basshysy óz sózinde Nurlan Balǵymbaevqa kóshe berý ýaqyt enshisindegi is ekenin atap ótti. Sebebi, jeke adamǵa kóshe ataýyn tek qaıtys bolǵan soń 5 jyl ótkende ǵana beriledi.

Aıta keteıik, Nurlan Balǵymbaev munaıshylar otbasynda dúnıege kelip, dınastııany jalǵastyrdy. Ol Munaı jáne gaz mınıstri, Premer-mınıstr qyzmetin atqaryp, І dárejeli «Barys» ordeniniń ıegeri atandy. Eskertkishtiń ashylýy kezinde inisi Nurbergen Balǵymbaev aǵasyn eske aldy.

«Atamyz Balǵymbaı 1911 jyly Dossordaǵy munaı kompanııasynda aǵash sheberi bolyp jumys istedi. Balǵymbaıdan taraǵan 5 bala munaıshy, odan taraǵan 25 bala da munaı-gaz salasynda eńbek etip júr. Al Aqtóbe oblysy Nurlan úshin úlken bastamaǵa serpin bergen óńir. Bas ınjener bolyp jumys istep, Máskeýde munaı jáne gaz mınıstrligine ketti. Aqtóbede munaı óńdeý zaýyty, Jańajolda uńǵymalar iske qosylyp jatqan kezde eńbek etti. Qazirgi kezde 400-500 uńǵyma bolsa, ol kezde 20-ǵa jýyq uńǵyma iske qosyldy. Apta, ondaǵan kún zaýyt basynda bolyp, aıaz ben ystyqqa qaramaı eńbek etti», - dedi Nurbergen Balǵymbaev.