Aqtóbede mektepterge «bomba qoıyldy» dep habarlaǵan kúdikti izdestirilip jatyr
AQTÓBE. QazAqparat – Aqtóbede búgin alty orta mektepte alǵashqy qońyraý bolmaı qaldy. Arnaıy jasaq «mektepke bomba qoıyldy» degen aqparatty tekserdi, dep habarlaıdy QazAqparat tilshisi.
Aqtóbe oblysy boıynsha barlyǵy 418 mektep bar. Búgin onyń altaýynda alǵashqy qońyraý saltanaty bolmady.
«1-qyrkúıek kúni saǵat 08:30 shamasynda №2 orta metkeptiń elektrondy poshtasyna Aqtóbe qalasynyń 6 mektebine (№1, 2, 21, 22, 51, 56 orta mektepteri) bomba qoıylǵany týraly habarlama kelip tústi. Barlyq shuǵyl qyzmetter men saperler toby dereý oqıǵa ornyna shyqty. Oqýshylardy, oqytýshylar quramy men jumysshylary evakýatsııalaý uıymdastyryldy. Polıtsııa departamenti kúdiktini anyqtaýǵa jáne ustaýǵa baǵyttalǵan jedel is-sharalar júrgizip jatyr. Atalǵan fakti boıynsha QR QK 273-baby, ıaǵnı, «Terrorızm aktisi týraly kórineý jalǵan habarlaý» baby boıynsha sotqa deıingi tergeý bastaldy. Osy baptyń sanktsııasy bes jylǵa deıin bas bostandyǵynan aıyrýdy kózdeıdi», - dep habarlady oblystyq PD baspasóz qyzmeti.
