Aqtóbede mektepterdi saqtap qalý úshin kópbalaly otbasylar aýylǵa kóship jatyr

AQTÓBE. KAZINFORM — Barlyǵy 80 mektepte bala sany jetpeıdi. Qazirgi kezde 13 mekteptiń máselesi ǵana sheshildi. 

Aqtóbe oblysyndaǵy aýyldarda oqýshy sany jyldan jylǵa azaıyp jatyr. Bıylǵy oqý maýsymynda 80 mektepke tizimge ilikti. Sebebi munda Oqý-aǵartý mınıstrligi bekitken talap oryndalmaı tur. Normatıv boıynsha bastaýysh mektepte keminde 5, negizgi mektepte 41, orta mektepte 81 oqýshy bolýy kerek.

— Buǵan deıin aýdan ákimderine aýyldarǵa kópbalaly otbasylardy tartyp, olarǵa úı berý, balalardy mektepke daıyndaý jáne olardy sharýa qojalyqtary arqyly jumyspen qamtý tapsyrylǵan edi. Qazirgi tańda Alǵa, Qobda jáne Muǵaljar aýdandaryndaǵy 13 mektepke 17 otbasy qonystanyp, 50 balamen normatıvke jetti. Sonymen qatar 26 aýylǵa 44 otbasy (122 bala) kóship keldi. Bul jumysty jalǵastyrý qajet, — dedi Aqtóbe oblystyq bilim basqarmasynyń basshysy Bulbul Kúzembaeva.

Buǵan deıin aýyl ákimi, mektep dırektorlary men muǵalimder kópbalaly otbasylardy aýylǵa shaqyryp, kóship kelýin surady. Aýylǵa qonystanǵan otbasylarǵa baspana berýge ázir otyr. Tek oqýshy emes, keıbir mektepte muǵalim de tapshy. 

Eske salsaq, buǵan deıin jańa oqý jylynda 6 mekteptiń qoldanysqa beriletini týraly aıtyldy. Onyń tórteýi «Keleshek mektepter» jobasy aıasynda boı kóterdi.