Aqtóbede mektepterdi attestatsııadan ótkizý kezinde para alǵan basshy isti bolyp jatyr
AQTÓBE. KAZINFORM — Aqtóbe oblysynyń bilim salasynda sapany qamtamasyz etý departamenti bóliminiń basshysy birneshe ret para alǵan. Ol qaıta attestatsııalaý kezinde dırektorlardan 50-70 myń teńge surap, óz qajetine jumsaǵan.
№ 2 Aqtóbe qalalyq sotynda Aqtóbe oblysynyń bilim salasynda sapany qamtamasyz etý departamenti bóliminiń basshysyna jáne Aqtóbe qalasy № 74 orta mektep dırektory, Narqyzyl negizgi orta mektebiniń dırektory men Yrǵyz aýdandyq bóliminiń sektor meńgerýshisine qatysty is qaralyp jatyr. Qylmystyq kodekstiń «Para alý», «Para berý», «Paraqorlyqqa deldal bolý» baptary boıynsha aıyptaý aktisi oqyldy. Іs materıalyna súıensek, bólim basshysy Aqtóbe oblysynyń bilim salasynda sapany qamtamasyz etý departamenti basshysynyń mindetin ýaqytsha atqarýshy ári komıssııa tóraǵasy bolǵan kezde attestatsııalaýda súringen mektepterdi qaıta attestattaý qujattarymen tanysady. Sol kezde mektepti esh kedergisiz attestatsııadan ótkize alatynyn bilgen komıssııa tóraǵasy bilim ordasynyń dırektoryna habarlasyp, qyzmeti úshin 70 myń teńge suraǵan.
№ 74 orta mektep dırektory komıssııa tóraǵasynyń zańǵa qaıshy talabyn oryndap, aqshany ekige bólip aýdarady. Birin kórshisiniń, ekinshisi tóraǵanyń áıeline jiberiledi. Al komıssııa tóraǵasy oń qorytyndy shyǵaryp, aqshany óz qajetine jumsaıdy.
Ekinshi epızodta Yrǵyz aýdanyndaǵy Narqyzyl negizgi orta mektebi aıtylady. Komıssııa tóraǵasy retinde memlekettik attestattaýdan kedergisiz ótkizýge yqpal jasaı alatynyn naqty uǵynyp, mektep dırektorynan deldal arqyly aqsha túrindegi para alýǵa baǵyttalǵan qylmystyq nıeti paıda bolǵan.
— 2025 jyldyń aqpan aıynda tóraǵalyq etken komıssııanyń hattamalyq sheshimimen mektepke attestattaldy degen qorytyndy berilgen. Komıssııa tóraǵasy para alýǵa baǵyttalǵan qylmystyq oıyn júzege asyrý maqsatynda Yrǵyz aýdanynyń bilim bóliminiń sektor meńgerýshisine habarlasyp, buıryqtyń fotosýretin jibergen. Keıin qaıta telefon shalyp, Narqyzyl negizgi mektebin qaıtalama attestattaýdan kedergisiz ótkizgeni úshin onyń dırektorymen arada deldal bolýyn suraǵan. Sektor meńgerýshisi zańsyz talaby oryndalmaı qalǵan jaǵdaıda jaǵymsyz saldary bolýy múmkin dep oılap, deldal bolýǵa kelisim bergen. Mektep dırektoryna habarlasyp, attestattaýdan kedergisiz ótkizgeni úshin para retinde 50 myń tg aqsha kerektigin jetkizgen. Mektep dırektory ózge bireý arqyly suraǵan aqshany berdi, — dedi sotta memlekettik aıyptaýshy.
Aqtóbe oblysynyń bilim salasynda sapany qamtamasyz etý departamenti bólimi basshysynyń kinási tolyq dáleldense múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyrylyp, paranyń 60 eselengennen 70 eselengenge deıingi somasy mólsherinde aıyppul salynýy nemese 7 jyldan 12 jylǵa deıingi merzimge bas bostandyǵynan aıyrylýy múmkin. Sot otyrysy kezinde aıyptalýshy óz kánisin tolyq moıyndady. Al № 74 orta mektep dırektory Qylmystyq kodekstiń «Para berý» baby boıynsha taǵylǵan aıyppen kelispedi. Narqyzyl negizgi orta mektebi dırektory men Yrǵyz aýdandyq bilim bóliminiń sektor meńgerýshisi tek ishinara moıyndady.
Sondaı-aq Aqtóbede Shalqar aýdandyq sáýlet, qurylys jáne qala qurylysy bóliminiń basshysy eki merdigerden mıllıondap para alǵany úshin aıyptalyp jatyr. Biri sý jelilerin qaıta jańǵyrtý, ekinshisi turǵyn úıge ınjenerlik ınfraqurylym tartý jobalarynyń merdigeri.