Aqtóbede mektepter men oqý oryndarynda dástúrli formatta bilim alýǵa ruqsat berildi
Aqtóbe oblystyq sanıtarııalyq-epıdemıologııalyq baqylaý departamenti 2021-2022 oqý jyldaryna arnalǵan jańa qaýly shyǵardy. Óńirdegi barlyq bilim berý mekemesi shtattyq rejımde jumysyn bastaıdy. Tek birqatar sanıtarlyq talapty qatań saqtaýy tıis. Birinshiden, pedagogtar men qyzmetkerlerdiń bári vaktsına saldyrǵan bolýy tıis. Tek medıtsınalyq qarsy kórsetilimi bar adamdar men COVID-19-dy juqtyryp, aýyrǵanyna úsh aı tolmaǵandar anyqtamasyn kórsetýi qajet. Ekinshiden, barlyq bilim berý uıymyna Ashyq qosymshasy engizilip, ata-ana men muǵalimder, qyzmetkerler, arnaýly jáne joǵary oqý ornynyń stýdentteri QR kod arqyly qaýipsiz mártebesin kórsetýge mindetti.
«Maska taǵý, ara qashyqty saqtaý tártibi saqtalýy tıis. Sonymen birge esik aldynda dene qyzýy ólshenip, sanıtaızerler ornatý mindetteledi. Ǵımarat ishin jıi tazartý, jeldetý qajet. Buqaralyq is-sharalardy ótkizýge tyıym salynady. Mektepke deıingi jáne orta bilim berý uıymdarynda toptar men synyptardy biriktirip, túrli sharalar ótkizýge bolmaıdy. Bastaýysh, orta jáne joǵary synyp oqýshylaryn bólek-bólek oqytý usynyldy. Olardyń sabaq ýaqyty men qońyraý kestesi ártúrli bolady. Ashanada tamaqtanýǵa bolady, biraq sanıtarlyq talap saqtalýy tıis. Al stýdentterdiń jataqhanasyna bógde adam kirgizilmeıdi», - dep jazylǵan qaýlyda.
Sonymen birge stýdentterdiń vaktsınanyń ekinshi komponentin alýy úshin jyljymaly medıtsınalyq pýnkt uıymdastyrý mindetteldi.
