Aqtóbede mektepter men balabaqshalarda Naýryz merekesin ótkizýge tyıym salyndy
AQTÓBE. QazAqparat – Aqtóbe oblysy «jasyl» aımaqta bolǵanymen, Naýryz merekesi mektepter men balabaqshalarda, kópshilik jınalatyn oryndarda ótkizilmeıdi, dep habarlaıdy QazAqparat tilshisi.
Ótken táýlikte óńirde 18 adamnan koronavırýs ınfektsııasy anyqtaldy. Olardyń 16-y — Aqtóbe qalasynyń turǵyny.
«Oblys boıynsha 124 adam ınfektsııalyq aýrýhanalarda jatyr. Onyń 100-i Aqtóbe qalasynda. Barlyǵy 9 naýqas jansaqtaý bóliminde», - dedi oblystyq densaýlyq saqtaý basqarmasynyń basshysy Rústem Isaev. Qazirgi kezde 2 myńnan astam adam vakıtsına qabyldady. Olar: dárigerler men muǵalimder, polıtsııa qyzmetkerleri. Sonymen birge stýdent, dıspanserlik esepte turǵan adamdar da ekpe qabyldady.
Aqtóbe oblystyq sanıtarııalyq-epıdemıologııalyq baqylaý departamenti mereke qarsańynda turǵyndarǵa saqtyq sharasyn taǵy bir eske saldy.
«Mektepter men balabaqshalarda Naýryz merekesin toılaýǵa bolmaıdy. Sonymen birge kez kelgen ujymdyq basqosýǵa tyıym salynǵan. Eger mundaı jaǵdaı tirkelse, mindetti túrde departamentke habar berýi kerek. Mamandar shara qoldanady»,- dedi Aqtóbe oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva.
Qazirgi kezde oblys boıynsha 47 monıtorıng toby bar. Jyl basynan beri 133 habarlama túsip, 19 mıllıon teńge aıyppul salyndy. Al Úılestirý ortalyǵyna 16 shuǵyl habarlama berilip, jospardan tys tekserý júrgizildi. Sóıtip taǵy 1 mıllıon teńge aıyppul salyndy.
«30-39 jas aralyǵyndaǵy jastardan jıi anyqtalyp jatyr. Jyl basynan beri 159 adam vırýs juqtyrdy. Sonymen birge jasy 65-ten asqan 123 adam da aýyryp, em izdedi»,- dedi Nursulý Berkimbaeva.
