Aqtóbede mektepte dastarhan jaıǵandardyń isi tekserilip jatyr
AQTÓBE. QazAqparat - Aqtóbede oblys ortalyǵynan aýdanǵa issaparǵa barǵandardy kútip alý úshin dastarhan jaıylǵan. Muny "Aqtóbe - adaldyq alańy" jobalyq keńsesi anyqtady, dep habarlaıdy QazAqparat tilshisi.
Oqıǵa 6 maýsym kúni tirkeldi. "Aqtóbe - adaldyq alańy" jobalyq keńsesiniń qyzmetkerleri aýdandardyń birine baryp, mekteptegi tehnologııa kabınetindegi dastarhandy kórdi. Áńgimelesý kezinde bul dastarhannyń oblys ortalyǵynan kelgen adamdarǵa arnalǵany anyqtaldy.
"Mol dastarhan 10 adamǵa arnalǵan eken. Dastarhan oblystyq pedagogıka, medıtsınalyq-psıhologııalyq keńes berý ortalyǵynyń qyzmetkerlerine arnap jaıylǵan. Ortalyq oblystyq bilim basqarmasyna qaraıdy. Olar aýdanǵa balalardy arnaıy korrektsııalyq bilim berý mekemesine jiberý úshin tekserýge kelgen eken. Qonaqtar óz qarjysyna dastarhan jaıǵanyn aıtty. Alaıda bul aqtalý ǵana. Aýdandyq bilim bólimi nege dastarhan jaıýy kerek? Mektepke dastarhan jaıý sanıtarlyq normaǵa saı kele me? Qazir barlyq jerde tamaqtanatyn oryn bar. Al az ǵana jalaqysy bar qyzmetkerler oblys ortalyǵynan barǵan ár adamdy osylaı kútip alsa ne bolǵany?" - dep málimdedi "Aqtóbe - adaldyq alańy" jobalyq keńsesiniń baspasóz qyzmeti.
Aıta keteıik, tirkelgen zańsyzdyqtar shara qoldaný úshin oblystyq bilim basqarmasyna joldandy. Al "Aqtóbe - adaldyq alańy" jobalyq keńsesi osy baǵyttaǵy jumysty jalǵastyrady. 
