Aqtóbede mektepke hıdjappen keletin qansha oqýshy qaldy

ASTANA. QazAqparat  -  Aqtóbede mektepke hıdjap kıip keletin 33 oqýshy qalyp otyr. Bul týraly búgin Ortalyq kommýnıkatsııalar qyzmetindegi baspasóz máslıhatynda Aqtóbe oblysynyń ákimi Berdibek Saparbaev aıtty, dep habarlaıdy QazAqparat.

«Hıdjap máselesinde zańǵa sáıkes júıeli jumys júrgizip jatyrmyz. Ol jumystardy ary qaraı jalǵastyramyz. Oǵan qoǵamdyq uıymdardy da jumyldyrý qajet. Bizde hıdjap kıetin balalardyń sany 530 bolatyn. Qazir 33 bala qaldy. Olardyń ata-analarymen jumys istep, túsindirip jatyrmyz», - dedi oblys basshysy.

Onyń aıtýynsha, talap barlyq balaǵa birdeı bolýy kerek. Barlyq bala qazirgi zamannyń talabyna, múmkindigine saı bilim alýy, emin-erkin oınaýy, sportpen aınalysýy kerek.

«Bul ata-ana retindegi barlyǵymyzdyń mindetimiz, paryzymyz. Eger biz balalarymyzdyń aldyndaǵy paryzymyzdy, mindetimizdi oryndamasaq, erteń ol balalar óskennen keıin bizge renish bildiredi. Olar qatarlastarynan kem bolady. Kezinde olar kónbeıtin bolsa, bul iske ózimniń de  aralasatyndyǵymdy aıtqanmyn. Biraq, qazir jumystyń nátıjesi bar», - dedi Berdibek Saparbaev.