Aqtóbede mektep janynda 700-ge jýyq lager jumys isteıdi

Aqtóbe oblysynda lagerlerdiń jazǵy maýsymǵa daıyndyǵy aıaqtaldy. Oblystyq bilim basqarmasynyń habarlaýynsha, jazǵy maýsymda 7 saýyqtyrý ortalyǵy, 699 mektep janyndaǵy lager jáne qosymsha bilim berý uıymdary janyndaǵy 49 jazǵy alań jumys isteıdi.

— Qala syrtyndaǵy lagerlerdiń daıyndyǵyna monıtorıng júrgizildi. Saýyqtyrý ortalyqtary balalardy qabyldaýǵa daıyn. Óńirdegi barlyq lagerdiń tıisti medıtsınalyq lıtsenzııasy bar. Mektep janyndaǵy lagerler 3 aýysymda 10 kúnnen jumys istep, 167 471 balany qamtıdy. Óńirdegi 49 qosymsha bilim berý uıymy 25 684 balanyń bos ýaqytyn tıimdi uıymdastyrady. Jetim, ata-anaqamqorlyǵynsyz qalǵan, az qamtylǵan, kópbalaly otbasylardyń balalary jáne erekshe balalar, quqyq qorǵaý organdarynyń esebine alynǵan jáne qolaısyz otbasynda tárbıelenip jatqan oqýshylar men balalar qala syrtyndaǵy jáne mektep janyndaǵy lagerlerde tegin demalady. Arnaıy sanattaǵy balalar túgel qamtylady, — dep habarlady Aqtóbe oblystyq bilim basqarmasynyń baspasóz qyzmeti.

Jazǵy lager kezinde 4850 pedagog jumys isteıdi. Sonymen birge pedagog mamandyǵy boıynsha bilim alyp júrgen 150 stýdent eńbekke aralasady. Pedagog jáne kishi qyzmetkerdiń bári mindetti túrde quqyq qorǵaý organdary tarapynan tekserýden ótedi.

— Tsıfrlandyrý jáne jasandy ıntellekt baǵyty aıasynda «AІdemalys», «Taza Qazaqstan» sheńberinde «Ekosana» jobalary iske asyrylady. Joba aıasynda 1000 balaǵa jazǵy demalys uıymdastyrylady. «Skills camp» jobasy sheńberinde 3000 oqýshy ýaqytsha «stýdenttik bılet» alyp, eki apta kolledjderde ınjenerlik, kompıýterlik grafıka, Web-dızaın, aqparattyq kabeldik jeliler, robototehnıka, elektronıka, shashtaraz isi, aspazdyq, kólik jóndeý boıynsha alǵashqy daǵdylardy meńgeredi. Bıyl alǵash ret Qobda aýdanyndaǵy «Álııa» jazǵy saýyqtyrý lageriniń bazasynda «Shabandoz» jobasy uıymdastyrylady. Joba aıasynda qatysýshylar jylqyǵa kútim jasap, atqa minýdi úırenedi, ulttyq at sporty týraly tereń biledi. Daryndy balalardy qoldaý jáne olardyń ıntellektýaldyq áleýetin damytý maqsatynda «Zııatker» jazǵy mektebi, tarıhı-mádenı murany saqtaý jáne balalar týrızmin damytý maqsatynda «Tarıh izimen» jobalary ekinshi jyl qatarynan uıymdastyrylady, — dep habarlady Aqtóbe oblystyq bilim basqarmasynyń baspasóz qyzmeti.

Aıta keteıik, «Jasyl el» jasaǵyna 693, «Sparta» sharýa qojalyǵyna 20, mektep ormanshylyǵyna 2 000, mektep aýlalarynda kógaldandyrýǵa 1000 bala tartylady. 35 myńnan astam oqýshy týrıstik saıahatqa shyǵyp, qosymsha bilim berý uıymdary janyndaǵy jazǵy alańdarda 25 myńnan astam bala tynyǵady.

Eske salsaq, 2026 jylǵy 1 sáýirden bastap elimizde alǵash ret balalar saýyqtyrý ortalyqtarynyń qyzmetin lıtsenzııalaý júıesi engizildi. Bul bastama balalardyń demalysy, oqýy jáne saýyqtyrylýy úshin biryńǵaı talaptardy qalyptastyrýǵa baǵyttalǵan.