Aqtóbede mektep ustazy oqýshysyna qol jumsady dep aıyptaldy
AQTÓBE. QazAqparat - Aqtóbedegi №45 orta mektep muǵalimi Araılym Eldesovaǵa qatysty tergeý bastaldy. Oqýshy bas-mı jaraqatymen aýrýhanada em qabyldap jatyr, dep habarlaıdy QazAqparat tilshisi.
Aqtóbe polıtsııasy muǵalimdi tergeýge aldy. Іstiń mán-jaıy áli belgisiz.
«10-sáýirde Aqtóbe qalasy Almaty aýdanynyń №4 polıtsııa bólimine bastaýysh synyp muǵaliminiń 1synyp oqýshysyna dene jaraqatyn keltirgeni týraly ata-anasynyń shaǵymy tústi. Aqtóbe medıtsına ortalyǵynyń balalar statsıonarynda kámeletke tolmaǵan balaǵa «jabyq bas-mı jaraqaty, bas mıynyń shaıqalýy» dıagnozy qoıylǵan. Osy derek boıynsha Qazaqstan Respýblıkasy Qylmystyq kodeksiniń 140-baby 2-tarmaǵy, ıaǵnı, «Kámeletke tolmaǵan adamdy tárbıeleý jónindegi mindetterdi oryndamaý» baby boıynsha sotaldy tergeý-tekserý sharalary júrgizilip jatyr», - dep habarlady oblystyq PD baspasóz qyzmeti.
Oqýshy em qabyldap jatyr, al muǵalimdi jumys toby baqylaýǵa aldy.
«11 sáýir kúni 1 synyp oqýshysynyń ájesi nemeresin ustazy 1 saǵat 45 mınýt urdy dep aryz túsirdi. Aryzdan soń mektep ishinde jumys toby qurylyp, tekserý júrdi. Synyp jetekshisi Araılym Eldesovanyń túsiniktemesi alyndy. Ol oqýshyǵa qol kótermegenin aıtty. 11-16 sáýir aralyǵynda ata-analar balalarynyń sabaǵyna qatysty. Polıtsııa da balalar men ata-analardy qatar otyrǵyzyp, túsinikteme aldy», - dedi mektep dırektory Almagúl Eshmaǵambetova.
Aıta keteıik, ata-ana jas maman Araılym Eldesovany jumystan shyǵarýǵa talap qoıǵan. Al muǵalim óziniń oqýshyǵa qol kótermegenin aıtty.
«Oqýshyny qyrkúıekten bastap alyp, sabaq berip kelemin. Oqý úlgerimin jaman dep aıta almaımyn. Men urǵan joqpyn, nege bulaı aıtqanyn bilmeımin», -dedi A.Eldesova.
