Aqtóbede mektep túlekteriniń kortejin uıymdastyrǵan júrgizýshiler jazalandy
AQTÓBE. QazAqparat – Aqtóbede mektep túlekteri kortejben júrip, bozbalalar kólik terezesinen shyǵyp, arnaıy lentalaryn jelbiretti. Polıtsııa barlyǵyn anyqtap, olardy ákimshilik jaýapqa tartty, dep habarlaıdy QazAqparat tilshisi.
Mektep túlekteriniń bul isi áleýmettik jeli arqyly tarap ketti. Monıtorıng júrgizgen polıtsııa qyzmetkerleri jol-kólik qozǵalysy erejesin buzǵandardy anyqtap, jazalady.
«Túlekter avtokólik terezelerinen shyǵyp, jol qozǵalysy erejelerin buzýǵa jol bergen. Avtokólik júrgizýshileri anyqtalyp, ákimshilik jaýapqa tartyldy. Túlekterdiń ata-analary kámeletke tolmaǵan balalary úshin jaýapty ekenin eskertemiz jáne búgin mektep oqýshylaryn qadaǵalaýdy kúsheıtýge shaqyramyz. Sonymen qatar, jaldamaly úıler men páterlerdiń ıeleri qandaı da bir is-sharalardy atap ótýge ruqsat bermeýi tıis. Sondaı-aq kámeletke tolmaǵandar túngi ýaqytta zańdy ókilderi nemese ata-anasynyń janynda bolýy kerek», - dep atap ótti PD bastyǵy Atyǵaı Arystanov.
Sonymen birge oblystyq tótenshe jaǵdaılar basqarmasy da ózen jaǵalaýynda baqylaýdy kúsheıtti. Bıyl Aqtóbe qalasynda 4 adam sýǵa batyp ketti. Onyń ekeýi bala.
