Aqtóbede mektep túleginiń óliminen soń balalarǵa baqylaý kúsheıdi
AQTÓBE. QazAqparat - Aqtóbe qalasynda mektep túlegi Azat Dúsipovtiń óliminen soń dırektorlar men synyp jetekshileri balalardy baqylaýǵa aldy, dep habarlaıdy QazAqparat tilshisi.
Oblystyq bilim basqarmasynyń basshysy Lázzat Orazbaevanyń aıtýynsha, qaıǵyly oqıǵadan keıin barlyq mektep dırektorlary men synyp jetekshilerine jınalys ótkizilip, túlekter oqýǵa túsip, jumysqa ornalasqansha turaqty aqparat berýge kelisti.
«Qaıǵyly oqıǵaǵa baılanysty tergeý jumystary júrip jatyr. Al bilim basqarmasy mektep dırektorlary men synyp jetekshilerin jınap, túsindirý jumystary júrgizildi. Ári oblystyq ІІD túngi reıdke shyǵyp, tártipti baqylap otyr. Balalardyń túngi ýaqytta demalys oryndarynda júrýine bolmaıdy, biraq ondaı derekter tirkelip tur. Sondyqtan ata-analarmen de kezdesip, balalardyń ár qadamyn baqylaýǵa alýǵa keńes berildi»,- dedi oblystyq bilim basqarmasynyń basshysy Lázzat Orazbaeva.
Azat Dúsipovtyń óliminen soń ata-analar óz balalary týraly aqparatty synyp jetekshilerine berip otyr. Endi olar arnaýly orta, joǵary oqý oryndaryna túsip, jumysqa ornalasqansha baqylaýda bolady.
«Túlekter 15 maýsymda mektepten ketti, biraq biz sonda da qaılyǵy oqıǵaǵa baılanysty jan-jaqty jumys júrgizýdi jalǵastyramyz. Mektep dırektorlary, synyp jetekshileri túlekterdiń ata-analarymen habarlasyp, olardyń qaıda, kimmen júrgenin bilip otyr. Kásibi, oqý tańdaýy, UBT tapsyrýy baqylaýda. Bul balalar oqýǵa túsip nemese jumysqa ornalasyp ketkenshe baqylaýda ustaıtyn bolamyz»,- dedi Lázzat Orazbaeva.
Eske sala ketsek, Aqtóbe qalasynda mektep túlegi Azat Dúsipovtiń ólimine qatysty Qylmystyq kodekstiń «Adam óltirý» baby boıynsha is qozǵalyp, fızıka-matematıka mektep-ınternatynyń túlegi qamaýǵa alynǵan bolatyn.
