Aqtóbede mektep túleginiń ólimine qatysty sotqa deıingi tyńdaý ótti
AQTÓBE. QazAqparat - Aqtóbede mektep túlegi Azat Dúsipov pyshaq jaraqatynan kóz jumyp, aıyptalýshy Beknaz Keńshilik sot aldynda jaýap berip jatyr, dep habarlaıdy QazAqparat tilshisi.
Aqtóbede 17-i maýsymnan 18-ne qaraǵan túni Azat Dúsipov pyshaq jaraqatynan kóz jumdy. Kúdikti retinde "Altyn belgi" ıegeri Beknaz Keńshilik qamaýǵa alynyp, búgin sotaldy tyńdaýyna jetkizildi. Oǵan Qylmystyq kodekstiń "Adam óltirý" baby boıynsha aıyp taǵyldy. Qylmysy asa aýyr bolǵan soń sot protsesýaldyq kelisim bolmaıtynyn túsindirdi.
"Bul dushpanǵa da tilemeıtin qaıǵyly oqıǵa. Sondyqtan qaza bolǵan jábirlenýshiniń ata-anasyna kóńil aıtamyz. Oqıǵany anyq bilý úshin sol jerde bolǵan Aıda Álibekova, Dilnaz Ertaev sekildi birneshe adamdy kýá retinde shaqyrýdy suraımyz. Sonymen qatar, jábirlenýshi men sottalýshynyń arasyndaǵy telefon arqyly bolǵan áńgimeni, áleýmettik jelidegi habarlamany alǵymyz keledi",- dedi aıyptalýshynyń qorǵaýshysy Raýshan Іztileýova.
Sot otyrysy kezinde memlekettik aıyptaýshy Azamat Baıbolatov aıyptalýshy Beknaz Keńshiliktiń minez-qulqyn, adamı qasıetin aıtyp beretin synyptastary men synyp jetekshisin, muǵalimderin shaqyrýǵa qarsylyq bildirdi.
Aıta keteıik, sotaldy tyńdaýy kezinde sottalýshy Beknaz Keńshilik Alqa bılerdiń qatysýyna qarsy boldy. Ol 8 tamyz kúni 17 jasqa toldy. Kámelet jasqa tolmaǵan sottalýshynyń anasy Basyǵaraeva da qorǵaýshy bolyp otyr. Al ákesi Nurbek Amanbaev zańdy ókili bolyp belgilendi.
Eske salsaq, jábirlenýshi Azat Dúsipovtyń anasy Elvıra Dúsipova óz ulynyń armandary týraly aıtyp berdi. Negizgi sot 4 qyrkúıek kúni bolady.
