Aqtóbede mektep túlegi jýsannan parfıýmdik ıis jasap shyqty
AQTÓBE. KAZINFORM – №78 orta mektep-gımnazııasynyń túlegi, «Altyn belgi» úmitkeri Ella Bekova óz ustazymen birge jýsannan parfıýmdik ıis jasap shyqty. Eki jyldyq eńbeginiń jemisin kópshilikke tanystyryp, halyqaralyq konferentsııada oqý grantyn da jeńip aldy.
Ella Bekova búginde bolashaq mamandyǵyn tańdap qoıǵan túlek. Ol medıtsına salasyn qup kórip otyr. Jas túlek dáriger bolýdy armandap, osy salaǵa beıimdele bastaǵanda birneshe zertteý jumysyn júrgizýdi jón kórdi. Oǵan synyp jetekshisi Jannur Baqytjanqyzy qoldaý kórsetip, baǵyt-baǵdar berip otyrdy.
– 2022-2023 jyldary jýsannan efır maıyn alý ádisin oılap taptyq. 2023-2024 oqý jyldary ári qaraı damytyp, parfıýmdik ıis aldyq. Bizdiń elimizde bul sala kenjelep qalǵan. Sondyqtan óz brendimizdi qalyptastyrýymyz kerek dep oılaımyn. Biz áıelderge de, erlerge de parfıýmdik ıis tabamyz dep úmittenemin. Qazir bizdiń qolymyzda erlerge arnalǵan ıis bar, - dedi Ella Bekova.
Jas zertteýshi áýeli jýsandy terip alady. Keıin odan gerbarıı jasap, gúli men japyraǵyn bóledi. Gúlin shyny ydysqa salǵan soń eki as qasyq kúnbaǵys maıyn quıyp, bir qasyq spırt, lımon shyrynyn qosady. Osy qospany kún sáýlesi joq jerge eki apta saqtaıdy. Keıin negizgi shıkizattan bólingen suıyqtyqty súzip alyp, efır maıyn shyǵardy.
– Zertteýdiń ekinshi satysynda parfıýmdik ıisti oılap taptyq. 5 ml efır maıyna 2,5 ml etıl spırtin quıdyq. Túrli ósimdikti paıdalanyp, synaq júrgizdik. Sońynda qalampyr men raıhan gúlin keptirip, sony qosyp, bekittik. Nátıjesinda osyndaı parfıýmdik ıis súzilip alyndy. Aldaǵy ýaqytta zertteýdi ári qaraı damytyp, óńirlik, otandyq brendke aınaldyrǵym keledi. Ataýyn «Jýsan» dep qoıdyq. Ártúrli baıqaýǵa jobany usyndyq. 2023 jyly jas ǵalymdar festıvalinde bas júrde aldym. Qyrǵyzstanda ótken baıqaýda 1-oryn alyp, oqý grantyn ıelendim, - dedi Ella Bekova.
Ǵylymı zertteý jobasynyń negizgi taqyryby – dárilik ósimdikterden efır maıyn alý. Negizgi jumys 2021-2022 oqý jylynda júrgizildi.
– Jýsan qoljetimdi, ózimizde ósedi. Efır maıyn alǵan soń ári qaraı jobany damytýdy qolǵa aldyq. Parfıým ıisin alyp kórý úshin kóp ósimdikten gerbarıı jasaldy. Alǵashynda sátsizdikter boldy. Gerbarıı jasaý kezinde ósimdiktiń tolyq óskenin kútemiz. Ony keptirip, kitaphanalarǵa baryp, anyqtaý jumysy júrdi. Keıin efır maıyna qosyp, kúttik. Sońǵy tájirıbede qalampyr men raıhan gúli nátıje berdi. Ǵylymı jumysta qıyndyqtar bolady. Ol úshin Q.Jubanov atyndaǵy AÓÝ oqytýshy-ǵalymdarymen aqyldastyq. Zerthanasyna baryp, qarapaıym tájirıbe ótkizý jolyn bildik,- dedi №78 orta mektep-gımnazııasynyń muǵalimi Jannur Baqytjanqyzy.
