Aqtóbede mektep pen balabaqshany kúrdeli jóndeýge 3 mlrd teńge bólindi
AQTÓBE. KAZINFORM – Barlyǵy 9 bilim jáne tárbıe berý mekemesi tizimge endi. Onyń 8-i mektep bolsa, bireýi mektepke deıingi uıym.
Aqtóbe oblysynda qazirgi kezde bilim berý ǵımarattaryn jóndeý jumysy bastaldy. Sonyń ishinde Aqtóbe qalasyndaǵy №37, №22 jáne №17 orta mektepteri men «Bilim-ınnovatsııa» mamandandyrylǵan lıtseıi bar. Áıteke bı aýdanynda M.Jumabaev atyndaǵy orta mektep, Baıǵanın aýdanynda Qaraýylkeldi orta mektebi, Muǵaljar aýdanynda Qumsaı orta mektebi, Temir aýdanynda S.Báıishev orta mektebi tizimge endi. Aqtóbe qalasyndaǵy №38 «Álem» balabaqshasynda da jóndeý jumysy bastaldy.
- Bilim berý jáne tárbıe salasyndaǵy ǵımarattardy jóndeý jumystaryn júrgizetin merdigerler anyqtaldy. Kúrdeli jóndeý jumystaryna oblystyq bıýdjetten 3 mlrd teńge bólindi. Jóndeý jumystary kezinde ǵımarattyń shatyry aýystyrylyp, qasbeti ózgeredi. Edeni, esigi aýystyrylady. Sý, káriz jáne elektr júıesi tolyq jańarady. Іshki árleý, syrlaý jumysy júredi. Kúrdeli jóndeý jumystary bıyl 20-tamyzǵa deıin aıaqtalýy tıis,- dep habarlady Aqtóbe oblystyq bilim basqarmasynyń baspasóz qyzmeti.
Aıta keteıik, Aqtóbede kópqabatty turǵyn úılerdiń 16% jýyǵy kúrdeli jóndeýdi qajet etedi. Óńirde 2 782 kópqabatty úı bolsa, onyń 440-y eskirdi. Bıyl kúrdeli jóndeý jumystaryna 670 mln teńgeden astam qarjy jumsalady.
