Aqtóbede mektep pen balabaqsha qurylysy uzaqqa sozylyp ketti
AQTÓBE. KAZINFORM - Aqtóbede mektep, balabaqsha, sport kesheniniń qurylystary der kezinde aıaqtalmaı, problemalyq nysanǵa aınaldy. Arasynda quny 2,5 mlrd teńge bolatyn bilim ordasy bar.
Qazirgi kezde 6 áleýmettik nysannyń qurylysy jaı júrip jatyr. Olar: Baıǵanın aýdanynyń Oımaýyt aýylyndaǵy 150 oryndyq mektep-balabaqsha, Muǵaljar aýdanynyń Qandyaǵash qalasyndaǵy mektep, Aqtóbedegi №51 mektep-gımnazııasynyń qoımasy, Temir aýdanynyń Shubarqudyq aýylyndaǵy basseın, Áıteke bı aýdanynyń Áıke aýylyndaǵy angar tıptegi sport kesheni jáne Shalqardaǵy fıtnes-ortalyq. Máselen «ARS BUILDING» JShS 2021 jyly Qandyaǵash qalasy Samal yqsham aýdanynda 600 oryndyq mektep salýdy bastady. Joba quny – 2,5 mlrd teńge. Arada úsh jyl ótse de mektep áli qoldanysqa berilgen joq.
- 2023 jyldan beri birneshe ret kezdestik. Bıyl mekteptiń qurylysyn aıaqtaýǵa ýáde berdi. Jyl ótti, eshteńe ózgergen joq. Nysannyń qurylysy áli aıaqtalmady, - dedi Aqtóbe oblysynyń ákimi Ashat Shaharov.
Keıin oblystyq qurylys, sáýlet jáne qala qurylysy basqarmasynyń basshysy Erjan Muzdybaevqa qurylys kompanııasymen aradaǵy kelisimshartty buzyp, sotqa berýdi tapsyrdy.
Aqtóbe oblysy ákiminiń baspasóz qyzmetiniń habarlaýynsha, sý tasqynynan zardap shekken aýyldarda bes bilim berý nysanynyń qurylysyn aıaqtaý, qurylysy uzaqqa sozylǵan Shılisaıdaǵy mektepti tapsyrý, jyl sońyna deıin Eset batyr turǵyn alabynda ornalasqan órt sóndirý deposyn paıdalanýǵa berý sııaqty tapsyrmalar berildi. Al Hromtaýdaǵy órt sóndirý bólimin merdiger 2025 jyly aıaqtaýy tıis.
- Árqaısysyńyz óz mindettemelerińizdi naqty túsinýlerińiz shart. Qurylys kestesin saqtaý mańyzdy. Biz jobalardyń sapaly ári ýaqytyly oryndalýyn qamtamasyz etýimiz kerek. Jyl sońynda kompanııanyń árbir basshysy óz sózderi úshin jaýap beredi. Endi eshqandaı syltaý qabyldanbaıdy», - dedi oblys ákimi A.Shaharov qurylys kompanııalarynyń ókilderine.
Aıtyp óteıik, Aqtóbede 124 áleýmettik nysanda qurylys-montaj jumystary júrgizilip jatyr. Taǵy 79 nysanǵa jobalyq-smetalyq qujat ázirlenedi. Sý tasqynynan zardap shekken Muǵaljar jáne Oıyl aýdandarynyń aýyldarynda 5 bilim berý nysany boı kóterip jatyr. Oıyl aýdany Oıyl aýylynda 320 oryndyq jáne Muǵaljar aýdany Kótibar aýylynda 60 oryndyq mektepter, sondaı-aq Muǵaljar aýdany Jaǵabulaq aýylynda jáne Oıyl aýdanynyń Oıyl jáne Qaratal aýyldarynda úsh balabaqshanyń qurylysy qarqyndy.
