Aqtóbede mektep pen aýrýhanadaǵy jylý júıesi kóńil kónshitpeıdi

AQTÓBE. QazAqparat - Aqtóbedegi balalar aýrýhanasynyń ishi salqyn, sonymen birge keıbir mektepterde jylytý jelisinen aqaý shyqty. Oblys ákimi Eraly Toǵjanov qalany aralaý kezinde osy kemshilikterdi joıýǵa tapsyrma berdi, dep habarlaıdy QazAqparat tilshisi.

Aqtóbe oblysynyń ákimi Eraly Toǵjanov áleýmettik nysandardy jylýmen qamtý jaıyn tekserdi. Bul máselege qatysty aqtóbelik turǵyndardyń da shaǵymdary bar.

Óńir basshysy Ana men balany qorǵaý ortalyǵynda boldy. Naýqastar medıtsınalyq mekemeniń salqyn ekenin aıtyp júr. Munda jylytý maýsymyna daıyndyqtyń qanaǵattanarlyqsyz bolǵany, bólimshelerdiń salqyn ekeni, terezelerinen jel soǵyp turǵany anyqtaldy.
«Siz qalaısha jylytý maýsymyna daıyn degen qujatqa qol qoıdyńyz?! Munda adamdar, ásirese balalar emdelýge keledi, em qabyldaıdy. Al qazir kerisinshe bári tońyp otyr. Úsh kúnniń ishinde máseleni sheshińiz, palatalarda normaǵa sáıkes, jyly temperatýra bolýy tıis», - dedi oblys ákimi.
Bilim mekemeleriniń arasynda №3 jáne №53 mektepterde de jylýmen qamtý týraly problema bar. Máselen №53 mektepte terezelerinen jel soǵyp tur. Sport zaldyń jylytý júıesi aıaz kezinde qatyp qalǵan. Bul máseleni oblys ákimi jiti baqylaýyna aldy. Búginnen bastap sport zalǵa jylý berilip, al eki kúnnen soń terezeler jóndelip, ǵımarattaǵy temperatýra qalypqa kelýi tıis. №3 orta bilim berý nysanynyń sport zalynda temperatýra +14+15 gradýstan aspaıdy. Jaqyn kúnderi jylytý júıesiniń aınalymyn durystaıtyn sorǵy iske qosylady. Sóıtip bul másele retteledi.
Oblys ákimi sondaı-aq Batys-2 shaǵyn aýdanyndaǵy №1G úıinde boldy. Durys jylytylmaıtyn úıdiń turǵyndary óńir basshysymen áńgimelesý barysynda sońǵy 2 kúnde jaǵdaıdyń jaqsarǵanyn, páterlerdiń jylyǵynyn alǵa tartty.