Aqtóbede mektep oqýshysy týberkýlezge shaldyqty
AQTÓBE. QazAqparat - Aqtóbede 4 synyp oqýshysynan qurt aýrýy anyqtaldy. Oqýshylar túgel tekserýden ótip jatyr, dep habarlaıdy QazAqparat tilshisi.
«Orta mektep oqýshysynan qurt aýrýy anyqtalýyna baılanysty mantý synamasy berildi. 2-11 synyp oqýshylary rentgenge, flıýoragrofııaǵa túsip jatyr. Bul mektepte 1 myń bala oqıdy desek, onyń teń jartysy mantý synamasyn aldy. Sol jartysynyń 30 paıyzynda mantý synamasy isti. Ol oqýshylar zerthanalyq tekserýden ótip, ftızıator dárigerge qaralady», - dedi № 4 Aqtóbe qalalyq emhanasynyń bólim meńgerýshisi Gúlbaqyt Qońyrova.
Aıta keteıik, mektep muǵalimderi jańa oqý jylyna kirispes buryn medıtsınalyq tekserýden ótken. Al mektepke sanıtarlyq tazalyq jumysy júrgizildi.
