Aqtóbede mektep oqýshysy muǵalimin sotqa berdi
AQTÓBE. QazAqparat - Aqtóbede mektep oqýshysy muǵalimin sotqa berdi. Ustaz Qylmystyq kodestiń «Densaýlyqqa qasaqana jeńil zııan keltirý» baby boıynsha sot aldynda jaýap berýde, dep habarlaıdy QazAqparat tilshisi.
Aqtóbe qalasyndaǵy №2 sotynda oqýshy men ustaz arasyndaǵy daý qaralyp jatyr. №10 mektep oqýshysynyń ájesi Gúlmıranyń aıtýynsha, muǵalim aǵylshyn tili, bı úıirmelerine qatysyp, aqsha tólemegeni úshin únemi nemeresin jazǵyryp, keıde qol kótergen. Ata-ana alǵashqy jyldary elemeı, oqýshy qyzdyń sózine mán bermeıdi. Keıin bas-mı jaraqatyn alyp, oqýshy 20 kúndeı balalar aýrýhanasynda em qabyldady.
«Únemi uryp, nemeremdi qyspaqqa alǵan eken. Aqsha jınasa, biz mektepte jınaýǵa bolmaıtynyn aıtyp, keıde bermeımiz. Sol sebepti jaman aty shyǵyp, muǵalim qyryn qaraı bastaǵan. Sońynda bala «bas-mı shaıqalýy» dıagnozymen aýrýhanaǵa tústi. Sol kezde jınalys boldy, qalalyq bilim bólimi kelip, qarady, muǵalim Madına Jumabaevany basqa mektepke aýystyrdy. Al nemereme endi synyptastary «seniń kináń bar, muǵalim ketip qaldy» dep tıisip, shettetip jatyr. Bala oqýǵa qulyqsyz, jan-jaqtan qysym bar»,- dedi oqýshynyń ájesi Gúlmıra. Oqıǵadan soń mektep muǵalimi Madına Jumabaeva ata-anadan keshirim surap, sotqa bermeýin ótingen. Biraq jábirlenýshi tarap densaýlyqqa zııan tıgizip, balany moraldyq qıyndyqqa dýshar etken ustazdyń bilim ordasynda jumys isteýine qarsy bolyp otyr.
Jábirlenýshi tarap sot otyrysy kezinde beıne, aýdıo dáleldi alǵa tartyp, aýrýhanada alǵan medıtsınalyq anyqtama arqyly ózderiniń aryzyn dáleldep shyqpaq. Olar bilim salasyndaǵy olqylyqtar týraly prokýratýraǵa da aryz túsirýdi kózdep otyr. Sot otyrysy 14 naýryz kúni bolady.
