Aqtóbede mektep oqýshysy júkti bolyp, qylmystyq is qozǵaldy

AQTÓBE. KAZINFORM — Buǵan deıin jasóspirim qyz birneshe ret túngi reıd kezinde ustalǵan.  

Aqtóbede polıtsııasy kámeletke tolmaǵan qyzben jynystyq qatynas jasaý faktisi boıynsha qylmystyq isti tergeýdi bastady. 

— Qazirgi ýaqytta zańnamada kózdelgen barlyq qajetti tergeý áreketteri júrgizilip jatyr. Jábirlenýshiniń quqyqtary men zańdy múddesin qorǵaý qamtamasyz etildi. Atalǵan qylmystyq isti tergeý barysy oblystyq polıtsııa departamentiniń erekshe baqylaýynda, — dep habarlady oblystyq PD baspasóz qyzmeti.

Al oblystyq bilim basqarmasy qyzdyń buǵan deıin profılaktıkalyq esepke alynǵanyn aıtty.

— Bul oqıǵaǵa deıin bilim berý mekemesi tarapynan barlyq tıisti sharalar qabyldanǵan. Júrgizilgen túngi reıdte kámeletke tolmaǵan turǵynnyń birneshe ret ustalǵany anyqtaldy. Ata-anasyna sol kezde eskertý jasalyp, oqýshy profılaktıkalyq esepke alyndy. Oqýshymen jeke jumys jospary jasalǵan, baqylaý ornatylǵan. Sol kezde júkti ekeni anyqtaldy, — dep habarlady Aqtóbe oblystyq bilim basqarmasy.

Buǵan deıin habarlaǵanymyzdaı, Aqtóbede oqýshy qyzdy zorlap, júkti qylǵan ógeı atasy sottaldy. 64 jastaǵy sottalýshy 21 jylǵa bas bostandyǵynan aıyryldy. Sot úkim taǵaıyndaǵan kezde onyń zeınetker ekenin eskerdi.