Aqtóbede mektep oqýshysy Ahmet Baıtursynulyna arnalǵan mobıldi qosymshany iske qosty

AQTÓBE. KAZINFORM – Aqtóbe qalasyndaǵy №64 orta mekteptiń oqýshysy Danıal Qurmanǵalı Ahmat Baıtursynulynyń ómiri men shyǵarmashyǵyna arnalǵan mobıldi qosymshany iske qosty. Qazir myńǵa jýyq adam qosymshany júktep alǵan. 

№64 Uzaqbaı Qulymbetov atyndaǵy mektep muǵalimi Erbol Medeýov oqýshysy Danıal Qurmanǵalıǵa mobıldi qosymsha jasap shyǵýǵa usynys berdi. Úzdik oqýshy ózi qyzyǵatyn baǵytta taqyryp tańdap, Ahmet Baıtursynulynyń ómiri men shyǵarmashylyǵyna toqtaldy. 

– Men qazir 9 synypta oqımyn. Jobany 7 synypta qolǵa alyp, aqparat jınaýdy bastadym. Nátıjesi jaqsy dep oılaımyn. Qazir qosymshany myńnan astam adam júktep alǵan, - dedi Danıal Qurmanǵalı. 

Oqýshy Aqtóbe oblystyq tarıhı-ólketaný mýzeıine, Q.Jubanov atyndaǵy Aqtóbe óńirlik ýnıversıtet kitaphanasyna bardy. Kóp ýaqytyn osy jerlerde ótkizip, aqparat jınaqtady. 

– Oqýshy matematıka, ınformatıka pánderimen qatar aǵylshyn tilin jaqsy meńgergen. Mobıldi qosymsha qurastyrý kezinde onyń óz paıdasy tıdi. Oqýshy tehnıka tilin tez úırendi, nátıjeli jumys istedi. Ár sabaq saıyn qyzyǵýshylyǵy artyp, sońynda qosymsha búkilálemdik market servısin júkteldi. Qosymsha 9 bólimnen turady. Ult ustazynyń ómir joly, shyǵarmalary, naqyl sózderi, óleńderi, elengen eńbekterimen qatar 3D týr da bar. Ǵalymnyń ómiri qıyn bolǵany belgili. Ol aǵartýshy, saıası tulǵa bolǵan. Qýǵyn-súrginge ushyraǵan kezi de qamtyldy. Áli de aqparatty tolyqtyramyz, - dedi muǵalim Erbol Medeýov. 

Mektep oqýshysy Danıal Qurmanǵalı aldaǵy ýaqytta ІT salasyn tereń meńgerip, jańa qosymshalar qurastyrýdy josparlap otyr.

Eske salsaq, buǵan deıin №64 orta mektep oqýshysy qaýip tóngenin habarlaıtyn qosymsha oılap tapqy.