Aqtóbede mektep qarjysyn qumar oıynǵa salǵan esepshi 7 jylǵa sottaldy

AQTÓBE. KAZINFORM – Aqtóbedegi №55 orta mektep esepshisi 400 mln teńge aqshany zańsyz ıemdenip, ony qumar oıynǵa salyp jibergeni úshin 7 jylǵa bas bostandyǵynan aıyryldy. Ol shyǵyndy óteýi tıis. 

№2 Aqtóbe qalalyq sotynda ótken sot otyrysyna bul joly óńirdegi 400-ge jýyq mekteptiń dırektory, esepshisi onlaın qatysty. Sońǵy sózinde sottalýshy óz kinásin tolyq moıyndap, anasynan keshirim surady.

- Men tergeý organdaryna únemi kómektestim. Óz isimdi jasyrmadym, moıyndadym. Meni qatań jazalamaýdy suraımyn. Qylmystyq kodekstegi «Senip tapsyrylǵan bóten múlikti ıemdenip alý nemese talan-tarajǵa salý» babyn «Alaıaqtyq» babyna aýystyrýdy suraımyn. Osy sátti paıdalanyp men anamnan keshirim suraımyn, - dedi sottalýshy.

Sot úkimimen B.Tajenov aıypty dep tanylyp, Qylmystyq kodekstiń «Senip tapsyrylǵan bóten múlikti ıemdenip alý nemese talan-tarajǵa salý» baby boıynsha 7 jylǵa bas bostandyǵanan aıyryldy. Ol 10 jyl boıy qarjyǵa jaýapty qyzmette eńbek ete almaıdy. Sonymen birge jazasyn qylmystyq atqarý júıesiniń qaýipsizdigi ortasha túzetý mekemesinde óteıdi. Sýdıa Aqmaral Álıeva Aqtóbe oblystyq bilim basqarmasynyń azamattyq talap aryzyn qanaǵattandyryp, sottalýshydan 413 mln teńgeden astam shyǵyndy óteýge mindettedi. Tekserý kezinde múlt ketken Aqtóbe oblystyq memlekettik ishki aýdıt departamentine, baqylaý júrgizbegen oblystyq bilim basqarmasyna jeke qaýly shyǵardy.

Eske salsaq, mektep esepshisi 2015-2023 jyldar aralyǵynda memleketke 413 mln teńgeden astam shyǵyn keltirdi. Ol qarjyǵa bás tigip, utylyp qalǵan.