Aqtóbede mektep-ınternattar eki apta karantınde bolady

AQTÓBE. QazAqparat – Aqtóbede karantın shekteýi kúsheıtildi. 13-26 sáýir aralyǵynda mektep-ınternattar karantınde bolady. Munda ózge adamnyń kirip-shyǵýyna tyıym salynady, dep habarlaıdy QazAqparat tilshisi.

Aqtóbe oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva jańa qaýly shyǵardy. Óńirde taǵy da karantın shekteýi kúsheıtiledi.

«Arnaıy, mamandandyrylǵan uıymdar, erekshe bilim berý qajettilikteri bar balalarǵa arnalǵan mektep-ınternattar (onyń ishinde ata-anasynyń qamqorlyǵynsyz qalǵan jetim balalarǵa), jalpy tıptegi mektep-ınternattar jáne daryndy balalarǵa arnalǵan mektep- ınternattardy 14 kúnge karantınge jabý uıymdastyrylsyn», - dep jazylǵan qaýlyda. Sonymen birge qarttar men sábıler úıi de osy tártipke baǵynýy tıis. Medıtsınalyq-áleýmettik ortalyqtarynda da 13-26 sáýir kúnderi karantın jarııalanyp, qyzmet kórsetetin personaldyń turýy úshin jaǵdaı jasalýy kerek.

«Al balalar men eresekterge arnalǵan bilim berý ortalyqtarynyń jumysyna ruqsat etilsin. Tek adam sany 15-ten aspaýy tıis», - dep jazylǵan qaýlyda.