Aqtóbede mektep-ınternat oqýshysynan COVID-19 anyqtaldy
AQTÓBE. QazAqparat – Aqtóbede memlekettik-jekemenshik seriktestik negizinde jumys istep turǵan mektep-ınternattaǵy bir oqýshydan koronavırýs ınfektsııasy anyqtaldy.
Bir synyptyń oqýshylary onlaınǵa kóshirilip, ózgesi dástúrli oqý formatynda bilim alyp júr, dep habarlaıdy QazAqparat tilshisi.
Aqtóbedegi «Bilim-Aqtóbe» mektep-ınternatynyń oqýshylary arasynda koronavırýs ınfektsııasynyń tirkelýine baılanysty Aqtóbe oblysynyń sanıtarııalyq-epıdemıologııalyq baqylaý departamenti ınfektsııalyq aýrý oshaǵynda dereý epıdemııaǵa qarsy is-shara júrgizdi.
«Bir oqýshy men baılanysta bolǵan 12 bala oqshaýlandy, medıtsınalyq baqylaýǵa alyndy. Bir synyptyń oqýshylary 14 kún boıy onlaın bilim alady. Ózgesi offlaın oqýdy jalǵastyrady. Mektep-ınternattyń barlyq tárbıelenýshisi medıtsınalyq baqylaýǵa alyndy. Olardyń temperatýrasy kúnine eki ret ólshenedi. Munda karantın, eshkim úıine jiberilmeıdi», - dep habarlady Aqtóbe oblystyq sanıtarııalyq-epıdemıologııalyq baqylaý departamentiniń baspasóz qyzmeti. Qazir munda 188 bala oqyp jatyr.
Aıta keteıik, ótken táýlikte óńirde taǵy 121 adamnan koronavırýs ınfektsııasy anyqtaldy. Onyń 93-i vırýstyń sımptomdy túrine shaldyqqan. Ádettegideı basym bóligi Aqtóbe qalasynyń turǵyny. Sonymen birge Oıyl aýdanynan ózgesinde de birer adam aýyryp, dáriger kómegine júgingen. Qazir 3 myńǵa jýyq adam karantınde. Olar eki apta úıden shyqpaı, dáriger baqylaýynda bolady.
