Aqtóbede mektep ınspektory tapshylyǵy máselesi sheshilmeı tur
AQTÓBE. QazAqparat - Aqtóbede mektep ınspektorlary tapshy, dep habarlaıdy QazAqparat tilshisi.
Aqtóbe oblysy boıynsha ótken jyly kámelet jasqa tolmaǵan 180-nen astam bala qylmystyq jazaǵa tartyldy. Oqýshylar arasynda qylmystyq jazaǵa tartylǵandar qatary 20, kolledj stýdentteri 25 paıyzǵa ósti. Onyń kóbisi urlyq, tonaý, alaıaqtyq, álimjettik jasaý. Sondyqtan aldaǵy 2-3 jylda mektepti túgel ınspektormen qamtamasyz etý mindeti tur.
«Aqtóbe oblysynda 456 bilim berý mekemesi bar. barlyǵy 114 mektep ınspektory jumys isteıdi. Bir ınspektorǵa 4 bilim berý mekemesinen keledi. Olar aptasyna eki ret mektepke barýǵa da úlgermeıdi. Qazir taǵy 170-ten astam ınspektor kerek, onyń 59-y oblys ortalyǵyna beriledi. Bul jaǵdaı oblys ákimine aıtyldy. 2-3 jylda másele sheshilýi tıis», - Aqtóbe oblystyq polıtsııa departamentiniń bastyǵy Mahambet Abısatov.
Aıta keteıik, polıtsııa ótken jyly 8 myńnan astam quqyq buzýshylyqtyń aldyn aldy. Barlyǵy 3,5 myń ata-ana ákimshilik jaýapkershilikke tartyldy.
«Bir jyl ishinde 600-den astam jasóspirim esepke alyndy. Bıyl jasóspirimder qylmysy 4 esege azaıdy», - dedi M. Abısatov.
