Aqtóbede mektep ınspektory oqýshyny urdy
AQTÓBE. QazAqparat - Aqtóbe qalasyndaǵy №2 orta mektepten shý shyqty. Qazir oblystyq ІІD oqýshyǵa qol kótergen mektep ınspektoryna qatysty isti tergep jatyr, dep habarlaıdy QazAqparat tilshisi.
Aqtóbe qalasyndaǵy orta mektepte bolǵan oqıǵa aldymen áleýmettik jelige jarııalandy. Óziniń aty-jónin jasyrǵan adam №2 orta mektepte ınspektordyń mektep formasyn saqtamaǵan oqýshyny urǵanyn aıtyp, kómek surady. Al oblystyq ІІD mektep ınspektorynyń elektroshoker paıdalanǵanyn rastamady.
«22 qyrkúıek kúni №2 orta mektepte bolǵan oqıǵaǵa baılanysty qyzmettik tekserý bastaldy. Tekserýden soń sheshim qabyldanady. Alaıda, jasóspirimder isi jónindegi ınspektordyń elektroshoker paıdalanǵany rastalǵan joq»,- dedi oblystyq ІІD baspasóz qyzmeti.
Qazirgi ýaqytta №2 orta mektep dırektory Sanııa Danısheva mektep ınspektorynyń oqýshyny urǵanyn rastap otyr.
«22 qyrkúıek kúni oqýshy men ınspektor arasynda kelispeýshilik oryn alǵan. Sol kezde mektep ınspektory oqýshyǵa qol kóteredi. Bıyl 1 qyrkúıek kúni mektep ınspektory qyzmetine 22 jastaǵy Elek polıtsııa bóliminiń qyzmetkeri kelgen bolatyn. Negizi mektep ınspektory men kezekshi oqýshylardy qarap shyǵyp, olardyń sabaqqa kelýi men ishki erejeni saqtaýyn tekseredi. Inspektor 10-synyp oqýshysymen sóılesip, keıin ońasha shyǵaryp alǵan. Inspektordyń urǵany jóninde kezekshi bilip, dál sol kúni polıtsııa men oqýshynyń ata-anasy shaqyrtyldy. Medıtsınalyq kabınette oqýshynyń densaýlyǵy tekserildi. Qazirgi kezde eki tarap tatýlasty. Mektepke basqa ınspektor berildi»,- dedi mektep dırektory Sanııa Danısheva.
