Aqtóbede mektep ınspektorlary otyratyn kabınet taba almaı júr
AQTÓBE. QazAqparat - Aqtóbede mektep ınspektorlaryna arnaıy kabınet berilmegen. Al keıbir mektepter pen kolledjder tártipti baqylaıtyn polıtsııa qyzmetkerlerin shaqyryp, keltire almaı júr, dep habarlaıdy QazAqparat tilshisi.
Aqtóbe oblysynda 128 mektep ınspektory bar. Ereje boıynsha 300 oqýshysy bar mektepke 1 ınspektor bólinedi. Aýdan ortalyqtarynda ınspektor bar, aýyldarda bul qyzmet ýchaskelik polıtsııa qyzmetkerine júktelgen. Qazirgi ýaqytta Aqtóbe oblysynyń ortalyǵynda 110 mektep ınspektory jumys istep júr.
«Bilim jáne ǵylym mınıstrligi men ІІM-niń birlesken buıryǵy bar. Mektep ınspektorlaryna jaǵdaı jasalýy tıis ekeni buıryqta anyq kórsetilgen. Biraq qazir mektep ınspektorlary nazardan tys qalyp jatyr. Eger mektep ınspektorlaryna jaǵdaı jasalmasa, arnaıy kabınet berilmese, biz bilim ordasyna bekitilgen quqyq qorǵaýshylardy alyp tastaımyz. Sebebi, bárine polıtsııa qyzmetkeri kerek, biraq olardyń jumys isteýine múmkindik jasalmaǵan. Sonda polıtsııa qyzmetkeri dálizde otyra ma? Oblystaǵy mektepter men kolledjderde 30 kabınet bólingen. Bar bolǵany 3 kompıýter ınspektorlar enshiliginde. Máselen, Aqtóbe qalasyndaǵy 76 mekteptiń tek 9 bilim ordasynda kabınet qarastyrylǵan. Ózgelerinde áleýmettik pedagog, psıhologtarmen, muǵalimder bólmesimen biriktirilgen», - dedi Aqtóbe oblystyq jergilikti polıtsııa qyzmetiniń bastyǵy Qanybek Jaqsyǵalıev.
Al Aqtóbedegi bilim ordalary kámeletke tolmaǵandardyń isi jónindegi polıtsııa qyzmetkerleriniń jumysyna kóńili tolmaıdy. Olar stýdentter arasyndaǵy álimjettikti baqylaý múmkin emes dep otyr.
«Balalardy qarsy alyp, sabaq bitken soń qoǵamdyq kólikke deıin aparamyz. Aýyl sharýashylyǵy kolledji mańynan ýchaskelik beket ashylǵan edi, biraq ol únemi jabyq turady. Polıtsııa beketi keshki saǵat 20:00-de ashylady, al stýdentter túski mezgilde sabaqtan shyǵady. Ásirese, oqýshylar shákirtaqy alǵan kezde qınalamyz. Álimjettik jasap, oqýshylardyń aqshasyn tartyp alatyndar, tóbeles shyǵaratyndar bar», - dedi Aqtóbe aýyl sharýashylyǵy kolledji dırektorynyń tárbıe isi jónindegi ınspektory Aıgúl Balmaǵambetova.
Aqtóbede bir ınspektor 3-5 mektepke qyzmet kórsetýge májbúr. Bul qıyndyqtardan habardar basshylar ázirge olardyń qatary artpaıdy dep kesip aıtty.
