Aqtóbede mektep dırektory áıeli men 7 jasar qyzyn pyshaqtap tastady

AQTÓBE. QazAqparat – Aqtóbe oblysy Shalqar aýdanynda mektep dırektory balasy men áıelin pyshaqtap tastady. Qazirgi kezde qylmystyq is tergelip jatyr, dep habarlaıdy QazAqparat tilshisi.

Oqıǵa Jańaqonys aýyldyq okrýginiń ortalyǵy Aqqaıtym aýylynda bolǵan. Aqqaıtym orta mektebiniń dırektory áıeli men balasyn pyshaqtap alǵan.

«Qylmystyq kodekstiń 99 baby, ıaǵnı, adam óltirýge oqtalý boıynsha is qozǵalyp tergeý júrip jatyr. Kúdikti eki aıǵa qamaýǵa alyndy. Ózge aqparat tergeý qupııalylyǵyna baılanysty taratylmaıdy», - dedi oblystyq PD baspasóz qyzmetiniń jetekshisi Erbolat Sarqulov.

Naýqastardyń halin Shalqar aýdandyq aýrýhanasynan surap bildik.

«Anasy men balasy bizge tústi. 7 jasar qyzynyń qulaq tusy, al áıeliniń buǵanasynyń ústinde kesilgen jara boldy. Jaraqattaryn tigip, tańyp berdik. Olar aýrýhanada em qabyldaýdan bas tartty. Sondyqtan ambýlatorlyq baqylaýǵa jiberdik», - dedi aýdandyq aýrýhana bas dárigeriniń orynbasary Erkebulan Erkinuly.

Aıta keteıik, Aqtóbede jol-kólik apaty da azaımaı tur .

Keshe «SHACMAN» avtokóliginiń 47 jastaǵy júrgizýshisi Mártók aýdanynan Aqtóbe qalasyna qaraı kele jatyp, rýlge ıe bola almaı qaldy.

Saldarynan joldyń qarsy baǵytyna shyǵyp ketti.«Kólik Aqtóbe qalasynyń 35 jastaǵy turǵynynyń basqarýyndaǵy «SHACMAN« avtokóligimen soqtyǵysqan. Apat saldarynan eki júrgizýshi oqıǵa ornynda qaıtys boldy.