Aqtóbede mektep dırektory «jala japty» dep sotqa bergen taǵy bir jýrnalıstiń isi jabyldy
AQTÓBE. KAZINFORM - Aqtóbe qalasynyń ákimshilik quqyqbuzýshylyqtar jónindegi mamandandyrylǵan aýdanaralyq sotynda jýrnalıst Ardaq Erýbaevaǵa qatysty is qaraldy. Yrǵyz gımnazııasynyń dırektory Gúljaınar Nuǵmanova “jala japty” dep aryz jazǵanymen, qaýly shyǵar kúni ony qaıtyp aldy.
Yrǵyz gımnazııasynyń dırektory Gúljaınar Nuǵmanova Ákimshilik quqyqbuzýshylyq týraly kodekstiń «jala jabý» babyn negizge alyp, aqtóbelik eki jýrnalıstiń ústinen aryz túsirdi.
Mektep dırektory ar-namysyma, qadir-qasıetime nuqsan keltirdi dep aryz jazǵan kezde polıtsııa ınspektorlary jýrnalısterden túsinikteme alyp, is sotqa tústi.
Buǵan deıin Asqar Aqtileýge qatysty is qaralyp, quqyq buzýshynyń kinási dáleldenbegen edi.
Al búgin qaralǵan iste mektep dırektory «jala japty» degen sózge psıhologııalyq- fılologııalyq saraptama júrgizilip, tujyrymy jarııalandy.
Onda «Gúljaınar Nuǵmanovanyń ar-namysy men qadir-qasıetine jáne iskerlik bedeline nuqsan keltiretin málimet joq» dep jazylǵan.
Sýdıa S. Amanǵalıuly búgin qaýly jarııalady.
— Ardaq Erýbaevaǵa qatysty Ákimshilik quqyq buzý týraly kodekstiń 73-3-babynyń 2-bóligimen kózdelgen ákimshilik quqyq buzýshylyq quramynyń bolmaýyna baılanysty toqtatylsyn. Qaýlyǵa rıza emes tarap 10 táýlik ishinde Aqtóbe oblystyq qylmystyq ister jónindegi appelıatsııalyq sot alqasyna appelıatsııalyq shaǵym nemese ótinish hat berýge quqyly, — dedi sýdıa S. Amanǵalıuly.
Jýrnalıst Ardaq Erýbaevanyń aıtýynsha, Yrǵyzdaǵy gımnazııa dırektory sot qaýlysy shyǵatyn kúni aryzyn qaıtaryp alǵan.
— Mektep dırektorynyń aryzy negizinde memlekettik saraptama taǵaıyndaldy. Demek memleketke shyǵyn kelip tur. Ári eki birdeı jýrnalısti dálelsiz áýre-sarsańǵa saldy. Sondyqtan mektep dırektory zań aldynda jaýap berýi qajet dep sanaımyn, — dedi ol.
