Aqtóbede mektep bitirý keshin uıymdastyrýǵa tyıym salynbaıdy
AQTÓBE. QazAqparat - Aqtóbede mektep bitirýshiler esh kedergisiz kesh uıymdastyra alady, dep habarlaıdy QazAqparat tilshisi.
Mektep bitirý keshine bilim ordasy jaýapty emes. ıAǵnı, túlek 12 maýsymǵa deıin attestat alyp, mektepten shyqqan soń kóńildi kesh uıymdastyra alady. Oǵan ata-anasy men túlektiń ózi ǵana jaýapty.
«Attestatty tabystaý rásimi mektep qabyrǵasynda ótkiziledi dep josparlanyp otyr. Qujatty tabys etý 10-12 maýsym aralyǵynda ótýi múmkin. Al kesh sol kúnderden soń uıymdastyrylsa, oǵan mektep jaýapty emes»,- dedi Aqtóbe qalalyq bilim bóliminiń sektor meńgerýshisi Gúlnaz Myrzaǵalıeva.
Aıta keteıik, Aqtóbe qalasy boıynsha bıyl 2600-den astam oqýshy mektep bitiredi. Onyń 2400-den astamy ulttyq biryńǵaı test tapsyrady. Ózgesi mektep attestatymen orta arnaýly oqý oryndaryna oqýǵa túspek. Túlekter búgin esse jazyp, emtıhan tapsyrdy. Al 2 maýsymda orys tili men tańdaýly pán boıynsha test suraqtaryna jaýap beredi. 6 maýsymda matematıkadan esep shyǵaryp, 9 maýsymda Qazaqstan tarıhynan aýyzsha emtıhan alynady.
