Aqtóbede mektep avtobýstary tekserildi
AQTÓBE. KAZINFORM — Avtobýstyń tehnıkalyq jaǵdaıy men júrgizýshilerdiń densaýlyǵy da talapqa saı bolýy kerek.
Aqtóbe oblystyq PD Ákimshilik polıtsııa basqarmasy búgin mektep avtobýstaryn ortalyqqa jınady. Munda sońǵy jyldary satyp alynǵan jańa avtobýstarmen qatar eskisi de tekserildi. Talap boıynsha mektep avtobýstarynyń eki esigi de jumys istep turýy tıis. Biri aldyńǵa, ekinshisi ortańǵy esik. Sonymen birge arnaıy mamandar órt sóndirý ballondarynyń jaramdylyǵyn, dári-dármek qorapshasyn qarap shyqty.
— On kúnnen soń jańa oqý jyly bastalady. Avtobýstyń tehnıkalyq jaramdylyǵymen qatar júrgizýshilerdiń sanaty tekserildi. Anyqtalǵan kemshilikterdi 1-qyrkúıekke deıin joıý kerek. Eger joıylmasa, ákimshilik jaýapqa tartylady, aıyppul salynady. Ókinishke qaraı jyl basynan beri 355 jol-kólik oqıǵasy kezinde 9 bala kóz jumdy, 424 bala túrli dene jaraqatyn aldy. Degenmen mektep avtobýstary jol-kólik oqıǵasynan din aman, — dedi Aqtóbe oblystyq PD Ákimshilik polıtsııa basqarmasy bastyǵynyń orynbasary Erkin Ótegen.
Onyń aıtýynsha, oblysy boıynsha 400-ge jýyq mektep avtobýsy bar. Búgin tehnıkalyq kemshilikter anyqtalsa, on kúnde joıylady. Sebebi polıtsııa Bilim kúni taǵy da tekserip, keıin ǵana júrýge ruqsat beredi.
Eske salsaq, Aqtóbede kópir ústinde qarsy baǵytqa shyqqan toı kortejiniń júrgizýshisi jazalandy. Toı kortejine qatysqan 5 kólik ıesine 11 hattama toltyryldy.