Aqtóbede mektep aýlasynda bir top ıtten qashqan oqýshyny adamdar qutqaryp qaldy
Aqtóbe oblysy Muǵaljar aýdanynyń ortalyǵy Qandyaǵash qalasynda mektep oqýshysyn bir top ıt qýyp, ony eresekter arashalap qaldy. Bala din aman, biraq qatty qorqyp qalǵan, dep habarlaıdy Kazinform.
Oqıǵa keshe Qandyaǵash qalasyndaǵy №2 jáne №4 mektep arasyndaǵy aýlada bolǵan. Beınematerıaldan balalarǵa júgirgen ıtti kórýge bolady. Bir top bala qashyp qutylsa, endibiri jerge jata qaldy. Sol sátte eresekter baryp, arashalap qaldy.
- Balamdy ıt qýyp, qaýyp ala jazdady. Sol kezde mektep aýlasynda júrgen áıel adamdar arashalap qaldy. Mundaı jaǵdaı birinshe ret bolyp tur. Biraq qala ishinde ıt kóp. Ol ıtterdi taýyp ta aldym. Ózime júgirip tur. Itterdi tapqanymmen ne isteı alamyn? Óltirsem jaýapqa tartylamyn. Sosyn keshe vıdeolarymdy alyp, ákimge bardym. «Shara qoldanamyz» dep aıtty. Tańerteń baryp tekserdim, áli júr. Balam qorqyp qalǵan, «mektepke barmaımyn» dedi. Kóndirip, búgin ózim aparyp tastadym. Túste keri alyp kelemin. Sol úshin de, balamnyń amandyǵy úshin de jumystan qalyp otyrmyn. Kúıeýim densaýlyǵy nasharlap, úıde otyr. Ol úsh jasar qyzymyzdy qaraıdy. Al men áleýmettik kómek alý úshin ári tabys qajet bolyp eńbekke aralasqan edim. Sonyń bárin tastap, balamdy tasyp júrmin, - dedi oqýshynyń anasy Tańnury Súleımenova.
4-synyp oqýshysy №2 Qandyaǵash qalalyq orta mektebinde oqıdy. Mektep №4 Qandyaǵash qalalyq orta mektebine jaqyn ornalasqan, aýlasy bir.
- Qandyaǵash qalalyq ákimdigine, polıtsııaǵa habar berildi. Balamen psıhologtar jumys istep jatyr. Ol din aman, zııany tımedi. Búgin mindetti túrde shara qabyldaıdy. Buǵan deıin de Qandyaǵash qalasy ákiminiń orynbasaryna, ıt atatyn mekemege eskertildi. Barynsha jumys istep jatyr. Degenmen qańǵybas ıtter aýlamyzda kóp júrgen soń osyndaı másele týyndap otyr, - dedi №2 Qandyaǵash qalalyq mektebiniń dırektory Jazıra Ábdenova.
Jergilikti ákimdik ıt aýlaý jumysy júrgizilgenin habarlady.
- QR «Janýarlarǵa jaýapkershilikpen qaraý týraly» Zańy 2022 jyldyń 2 naýryzynan bastap kúshine endi. Soǵan sáıkes qańǵybas ıtterdi birden joıý jumystary toqtatylǵan bolatyn. Degenmen bul másele ózekti bolýyna baılanysty Qandyaǵash qalasynda qańǵybas ıtterdi aýlaý jumystary zańdylyqqa sáıkes uıymdastyrylyp jatyr. Qazirgi tańda qańǵybas ıtterdi aýlaý jumystaryn júrgizý turǵyndardyń jazbasha túrdegi aryzymen júzege asyrylady. Osy beınejazbadaǵy jaǵdaı boıynsha jeke turǵynnyń aryzy negizinde ıtter aýlandy. 2023 jyldyń basynan búgingi kúnge deıin aýdan boıynsha 1 200 qańǵybas ıt jáne 50 mysyq aýlandy. 2024 jylǵa Muǵaljar aýdany boıynsha qańǵybas janýarlardy aýlaý, ýaqytsha ustaý, birdeılendirý, sterıldeý jumystaryna 18 mln teńgeden astam qarjy bólindi, - dep habarlady Muǵaljar aýdandyq ákimdigi.
Posmotret etý pýblıkatsııý v Instagram
