Aqtóbede mektep ashanasy azyq-túlikti ata-analardyń qoldaryna ustatyp jibergen
AQTÓBE. QazAqparat - Aqtóbe oblysy, Muǵaljar aýdanynyń sybaılas jemqorlyqqa qarsy is-qımyl aýdanaralyq basqarmasy mektepte áleýmettik az qamtylǵan otbasy balalaryn tamaqtandyrmaı, azyq-túlikti ata-analardyń qolyna ustatyp jiberý deregin anyqtady, dep habarlaıdy QazAqparat tilshisi.
Sybaılas jemqorlyqqa qarsy is-qımyl Ulttyq bıýrosynyń Aqtóbe oblystyq departamenti, Muǵaljar aımaǵy boıynsha sybaılas jemqorlyqqa qarsy is-qımyl aýdanaralyq basqarmasy tekserýden soń Ádep keńesin tańqaldyrdy. Aýdıtorlyq tekserý barysynda Muǵaljar aýdandyq bilim bóliminiń laýazymdy qyzmetkerleri men konkýrstyq komıssııa músheleri jeke jáne zańdy tulǵalarǵa zańsyz qoldaý kórsetýi anyqtalyp otyr. Aýdandyq bilim bólimi men qoǵamdyq densaýlyq saqtaý basqarmasy jeke kásipker A.Kóptileýovaǵa basymdyq berip, aýdandaǵy 35 mekteptiń ashanasyn túgel senip tapsyrǵan. Az qamtylǵan otbasy balalaryn ystyq tamaqpen qamtamasyz etýi tıis jeke kásipkerdiń ózi Aqtóbe qalasynda turady. Memlekettik satyp alý quny - 57 mıllıon teńge.
«Aýdandaǵy 35 mektepte bilim alatyn az qamtylǵan otbasy balalaryn tamaqtandyrý konkýrsyn bir kásipker jeńip alǵan. Qujattary saı kelmese de ony konkýrsqa qatystyryp, jeńiske jetken. Muǵaljar aýdandyq bilim bólimi qoldaý kórsetip, nátıjesinde zańsyz shart jasalǵan. Іshki aýdıtorlyq tekserý kezinde qujatta birneshe aspaz jumys isteıdi dep kórsetilgenimen shyn máninde tek bir aspazdyń eńbek etkeni anyqtaldy. Sonymen qatar, keıbir mektepte ashana jumys istemeı, az qamtylǵan otbasy balalarynyń ata-analaryna azyq-túlik qolma-qol berilgen. Az qamtylǵan balalardyń quqyǵy buzyldy»,- dedi Sybaılas jemqorlyqqa qarsy is-qımyl Ulttyq bıýrosynyń Aqtóbe oblystyq departamenti, Muǵaljar aımaǵy boıynsha sybaılas jemqorlyqqa qarsy is-qımyl aýdanaralyq basqarmasynyń aǵa ofıtseri Ashat Teleýov.
Aıta keteıik, konkýrstar zańsyz dep tanylyp, 30 mektepte oqıtyn az qamtylǵan otbasy balalaryn tamaqtandyrý qujattary keri qaıtaryldy. Al Ádep keńesi Muǵaljar aýdandyq bilim bólimi basshysynyń orynbasary Amangeldi Quletti jumystan shyǵarý týraly uıǵarym berdi. Muǵaljar aýdandyq qoǵamdyq densaýlyq saqtaý basqarmasynyń bólim basshysy Nurken Ótegenovke qyzmetine tolyq saı emes degen sheshim shyǵaryldy.
