Aqtóbede mektep ashanasynda bálish satqan dırektor jumystan shyǵaryldy
AQTÓBE. KAZINFORM – Alǵa aýdany Toqmansaı orta mektebiniń muǵalimderi áleýmettik jeli arqyly shaǵym túsirdi. Tekserý kezinde dırektordyń pedagogıkalyq ádepti saqtamaı, ashanada tyıym salynǵan zattar satqany anyqtaldy.
Aqtóbe oblysy Alǵa aýdany Toqmansaı aýylyndaǵy orta mektep ustazdary áleýmettik jeli arqyly mektep dırektorynyń jumysyn synady. Shaǵymǵa súıensek, pedagogter arasynda júkteme talap saı bólinbeıdi, mektep dırektory muǵalimder men qyzmetkerlerge dóreki sóılep, aıqaılaıdy.
- Mektep dırektory oqýshylardy ystyq tamaqpen qamtamasyz etip otyrǵan jalǵa alýshylardyń atyn jamylyp, ashanada bálish (pırojkı-red.), shokoladtar satyp otyr. Samsanyń aqshasyn Oralda oqıtyn qyzynyń telefon nómirine aýdartady. Qolma-qol túsken aqshany ózi alady,- dep jazylǵan shaǵymda.
Sonymen birge dene shynyqtyrý, kórkem eńbek pánderiniń durys uıymdastyrylmaıtyny týraly jazylǵan. Dene shynyqtyrý páni muǵalimi tústen keıin fýtbol úıirmesin ótkizýi qajet. Alaıda úıirme bolmaıdy. Al eńbek páni muǵalimi ýaqytsha alǵashqy áskerı daıyndyq pánin de ótkizgen.
Muǵalimder bul týraly ashyq aıta almaı, áleýmettik jeli arqyly jasyryn taratqan. Shaǵym túsken soń Aqtóbe oblystyq bilim basqarmasy arnaıy komıssııa quryp, tekserý júrgizdi.
- Tekserý kezinde dırektordyń pedagogıkalyq ádep talaptaryn saqtamaǵany, muǵalimder arasyndaǵy júktemeni durys bólmegeni, sonymen birge mektep ashanasynda tyıym salynǵan ónimdi satqany belgili boldy. Buzýshylyqtar anyqtalǵan soń mektep dırektory A.Qarasaeva bıyl 8-sáýir kúni jumystan bosatyldy,- dep habarlady Aqtóbe oblystyq bilim basqarmasynyń baspasóz qyzmeti.
Aıta keteıik, Aqtóbede NZM-ǵa oqýǵa túsirýge ýáde etken muǵalim sottaldy. Muǵalimge 3 jylǵa bas bostandyǵynan shekteý jazasy taǵaıyndaldy. Ol 100 saǵat qoǵamdyq jumysqa da tartylady.
