Aqtóbede mektebi joq eldi meken balalary avtobýspen qatynaıdy

AQTÓBE. KAZINFORM — Oblysta mektebi joq 60 eldi meken bolsa, onyń 20-ynda mektep jasyndaǵy bala bar. Olar sabaqqa avtobýspen qatynaıdy. 

Aqtóbe oblysy boıynsha mektebi joq eldi mekenderde 199 bala turady. Jańa oqý jylynda olardy 20 mektepke tasymaldaıdy.

— Mektebi joq 60 eldi mekenniń 20-synda mektep jasyndaǵy balalar bar. Bári de bilim ordasyna avtobýspen qatynaıdy. Sonymen qatar taǵy 125 mektep avtobýsy kún saıyn 12 514 oqýshyny tasymaldaıdy. Olar bilim berý uıymdarynan úsh shaqyrym jáne odan da uzaq jerde turatyn balalar, — dep habarlady Aqtóbe oblystyq bilim basqarmasynyń baspasóz qyzmeti.

Jańa oqý jylynda jalpy sany 12 713 bala tasymaldanatyn boldy. Barlyǵy 145 avtobýs qyzmet kórsetedi. Onyń 53-i mektep teńgeriminde bolsa, qalǵan 92-in ýaqytsha jalǵa alǵan.

Eske salsaq, keshe Aqtóbe oblystyq polıtsııa departamenti ákimshilik polıtsııa basqarmasy avtobýstardyń jaramdylyǵyn tekserdi.