Aqtóbede medýnıversıtet stýdenti memlekettik grantynan aıyryldy
AQTÓBE. QazAqparat - Marat Ospanov atyndaǵy Batys Qazaqstan memlekettik medıtsınalyq ýnıversıtetiniń stýdenti Rústem Ońǵarbaev bilim grantynan aıyryldy. Ýnıversıtet ákimshiligi talapker kezinde qujat durys toltyrylmaǵan dep ýáj aıtty, dep habarlaıdy QazAqparat tilshisi.
Rústem Ońǵarbaev buǵan deıin Marat Ospanov atyndaǵy Batys Qazaqstan memlekettik medıtsınalyq ýnıversıtetinde bir jyl boıy 630 myń teńge tólep oqydy. Otbasynyń áleýmettik jaǵdaıy tómen bolǵan soń bolashaq dáriger qaıta qujat tapsyryp, túlekter qataryna endi. 2018-2019 oqý jylynda Marat Ospanov atyndaǵy Batys Qazaqstan memlekettik medıtsınalyq ýnıversıtetiniń jalpy medıtsına fakýltetine grantqa tústi. Qolynda sertıfıkaty men qujattary bar. Kenet qabyldaý komıssııasy Rústem Ońǵarbaevqa qaıta telefon shalyp, 2018 jyldyń 27 tamyzy kúni grant qate berilgenin aıtady. Bas tartý týraly aryz jaz deıdi. Arada 2 aı ótkende ýnıversıtet ákimshiligi stýdentti dáriske kirgizbeı qoıdy.
«Mektepti jaqsy aıaqtap, medıtsınalyq ýnıversıtettiń aqyly bólimine oqýǵa tústim. Ótken jyly ýnıversıtettiń birinshi kýrsyn sátti aıaqtap, grantqa túsýdi oıladym. Eger túse almasam, 2-kýrstaǵy oqýymdy jalǵastyrýǵa múmkindigim bar eken. Men osy sátti paıdalanyp, qujat toltyrdym. Keshendi testti 15 shilde kúni tapsyrdym. Barlyǵy 122 bal jınaldy. Alǵashqy mamandyǵym qoǵamdyq densaýlyq saqtaý salasynda edi. Men naýqastardy emdep, adamdarǵa kómegimdi tıgizgim keldi. Qujatpen júretin emes, naǵyz emdeý salasyn tańdadym. Ókinishtisi, ýnıversıtet ákimshiligi qarsylyq kórsetip, eki aı ótken soń dáriske kirgizbeı qoıdy. Olar óz qolymmen aryz jazyp, memlekettik granttan bas tartýymdy surady», - dedi Rústem Ońǵarbaev.
Stýdenttiń otbasy mán-jaıdy tolyq anyqtaý úshin prokýratýraǵa aryz jazatyn boldy. Al ýnıversıtet ákimshiligi istiń aq-qarasyn anyqtaý úshin polıtsııaǵa shaǵym túsirdi.
«Qujattardy qabyldaý kezinde oralman statýsyn belgilegen. Al ol 2015 jyly Qazaqstan azamattyǵyn alǵan bolyp shyqty. Test qorytyndysy boıynsha grantqa ıe bolmasa da Bilim jáne ǵylym mınıstrligi komıssııasynyń sheshimimen «Qazaqstan Respýblıkasynyń azamaty bolyp tabylmaıtyn ulty qazaq azamattaryna arnalǵan kvota» sanaty boıynsha «Jalpy medıtsına» mamandyǵynyń bilim berý grantyna ilikti. Qabyldaý komıssııasynyń jumysy aıaqtalǵan soń monıtorıngtik tekserý júrip, Rústem Onǵarbaevtyń qujattarynan onyń oralman emestigin, grant zańsyz berilgenin anyqtadyq. Bul is boıynsha barlyq materıaldar Aqtóbe oblysynyń polıtsııa departamentine jiberildi», - deıdi ýnıversıtet prorektory Talǵar Ábilov.
