Aqtóbede medıtsınaǵa 5,7 mlrd teńge bólindi: jańa jedel járdem stansasy salynady
ASTANA. KAZINFORM — Aqtóbe oblysynda densaýlyq saqtaý salasyndaǵy úsh jobany júzege asyrýǵa 5,7 mlrd teńgeden astam qarjy bólindi. Qarajat Aqtóbe qalasynda jańa jedel járdem qosalqy stansasyna jáne Yrǵyz aýdanyndaǵy emhanaǵa, Jańaqonys turǵyn alabyndaǵy oblystyq psıhıkalyq densaýlyq ortalyǵyna qosymsha ǵımarattar salýǵa baǵyttaldy. Barlyq nysandardy 2027 jyldyń sońyna deıin aıaqtaý josparlanǵan. Bul týraly Úkimet málim etti.
Memleket basshysy Quryltaıdyń birinshi sessııasynda qoıǵan mindetteri sheńberinde Úkimet óńirlerde áleýmettik ınfraqurylymdy ozyq qarqynmen damytý boıynsha jumystar júrgizip jatyr.
— Aqtóbe qalasyndaǵy Qarǵaly turǵyn alabynda quny 3 mlrd teńgeden asatyn, 10 sanıtarlyq mashına sııatyn garajben jabdyqtalǵan, jylyna 25 myń shaqyrtýǵa barýǵa arnalǵan jedel jáne shuǵyl medıtsınalyq kómektiń jańa qosalqy stansasy salynady. Jańa qosalqy stansa brıgadalardyń kelý ýaqytyn qysqartýǵa jáne Qarǵaly, Aqjar, Kóktem, Qyzyljar syndy basqa da qala mańyndaǵy aýmaqtardyń qarqyndy damyp kele jatqan turǵyn alaptarynyń turǵyndary úshin shuǵyl kómektiń jedeldigin arttyrýǵa múmkindik beredi. Qazirgi ýaqytta jumys istep turǵan qosalqy stansanyń jeti brıgadasy shamamen 110 myń adamǵa qyzmet kórsetedi. Sondaı-aq osy aýdandardyń belsendi damýy jedel járdem qyzmetine júktemeniń odan ári artýyna ákeledi, — delingen habarlamada.
Sonymen qatar óńirdegi qoldanystaǵy medıtsınalyq uıymdardyń qýatyn keńeıtýge baǵyttalǵan eki jobaǵa qarajat bólindi. Jańa nysandardyń paıdalanýǵa berilýi esebinen kabınet qory keńeıtilip, patsıentterdi qabyldaý jaǵdaıy jaqsarady. Atap aıtqanda, Yrǵyz aýdandyq aýrýhanasynyń janynan aýysymyna 300 adam qabyldaýǵa arnalǵan quny 1,3 mlrd teńge bolatyn eki qabatty emhana ǵımaraty salynady. Jańaqonys turǵyn alabyndaǵy oblystyq psıhıkalyq densaýlyq ortalyǵyna quny 1,4 mlrd teńge bolatyn eki qabatty ǵımarat salynady.
Jalpy, osy jobalardy júzege asyrý medıtsınalyq ınfraqurylymdy odan ári jańartýǵa jáne azamattarǵa kórsetiletin medıtsınalyq qyzmetterdiń qoljetimdiligi men sapasyn arttyrýǵa yqpal etedi.
Aıta keteıik, buǵan deıin Aqtóbede 35 myń kórermen syıatyn stadıon boı kóteretinin jazdyq.
