Aqtóbede medıtsınalyq klasterdi damytý strategııasy tanystyryldy
AQTÓBE. QazAqparat - Aqtóbede medıtsınalyq klasterdi damytý strategııasy halyqaralyq dárejedegi sarapshylardyń qatysýymen jasaldy. 2018-2022 jyldarǵa arnalǵan baǵdarlamany iske asyrý kezinde medıtsınalyq ýnıversıtetke basymdyq beriledi, dep habarlaıdy QazAqparat tilshisi.
Aqtóbe oblysynda medıtsınalyq klaster qurý jumysy ótken jyly bastaldy. Elimizde alǵash ret jedel járdem stantsııasy túrik ınvestorlaryna berilip, jańa ortalyq salynyp jatyr. Birneshe reanımobıl jetkizildi. Al keshe oblys ákimdiginde halyqaralyq sarapshylardyń qatysýymen jasalǵan strategııalyq jospar tanystyryldy.
«Bul úshin joǵary tehnologııalyq medıtsınalyq qyzmetterdiń úlesin arttyrý, ishki medıtsınalyq týrızmdi damytý, klaster qalyptastyrýshy sýbektilerdiń ınfraqurylymdyq quramyn odan ári jańǵyrtý jáne Aqtóbe medıtsınalyq klasterin halyqaralyq akkredıtatsııalaý josparlanyp otyr»,- dedi Aqtóbe oblystyq densaýlyq saqtaý basqarmasynyń basshysy Áset Qalıev.
Medıtsınalyq klasterdi damytý kezinde M.Ospanov atyndaǵy Batys Qazaqstan memlekettik medıtsınalyq ýnıversıtetine basymdyq beriledi.
«Medıtsınalyq klasterdiń tıimdiliginiń negizgi belgisi oblys halqynyń densaýlyq kórsetkishteriniń jaqsarýy men medıtsınalyq týrızmniń damýy arqyly kórinedi. Osy maqsattarǵa jetý úshin birlese jumys istep, medıtsına salasynyń barlyq sýbektileriniń ózara qarym-qatynasy jaqsy bolýy qajet»,- dep atap ótti B.Saparbaev.
Aıta keteıik, medıtsınalyq klaster qurý medıtsınalyq uıymdar qyzmetteriniń sapasy men tıimdiligin arttyrýǵa múmkindik berdi. Eń aldymen, eńbek ónimdiligi artyp, dıagnostıka men emdeý sapasy jaqsarady. Ári joǵary tehnologııalyq medıtsınalyq qyzmet, statsıonarlyq medıtsınalyq qyzmet jumystary halyqaralyq standarttarǵa saı júrgiziledi. Aqtóbe oblysy ákiminiń baspasóz qyzmetiniń habarlaýynsha, medıtsınalyq klasterdi damytý kezinde memlekettik-jekeshelik áriptestikti arttyryp, oǵan sheteldik seriktesterdi tartý jetistikterdiń biri bolyp sanalady.
