Aqtóbede medıtsına mekemesiniń kóligin urlap aıdap ketken
AQTÓBE. QazAqparat – Aqtóbede medıtsınalyq mekemeniń arnaıy kóligin toqtatqan polıtsııa qyzmetkerleri júrgizýshiniń ony bireýdiń aýlasynan zańsyz aıdap ketkenin anyqtady, dep habarlaıdy QazAqparat tilshisi.
Patrýldik polıtsııa qyzmetkerleri Órleý aýyly mańynda jol erejesin buzǵany úshin «ÝAZ» avtokóligin toqtatty. 29 jastaǵy er adam kólik quralyn mas kúıinde basqarǵan. Tekserý kezinde onyń buǵan deıin kólik quralyn basqarý quqyǵynan aıyrylǵany anyqtaldy.
«Avtokólik medıtsınalyq mekemege tıesili. Júrgizýshi ol mekemede resmı túrde jumys istemeıdi. Er adam polıtsııa qyzmetkerlerine Aqtóbe qalasy Qazanǵap kóshesindegi úıdiń aýlasynan «ÝAZ» avtokóligin zańsyz ıemdenip, Órleý aýylyna barǵanyn aıtty. QR QK-niń «Avtomobıldi zańsyz ıelený», sondaı-aq QR QK-niń «Kólik quralyn basqarý quqyǵynan aıyrylǵan, alkogoldik masań kúıdegi adamdy basqarý» baby boıynsha sotqa deıingi tergeý bastaldy. Kúdikti Aqtóbe qalalyq PB ýaqytsha ustaý ızolıatoryna qamaýǵa alyndy», - dedi oblystyq PD baspasóz qyzmetiniń jetekshisi Erbolat Sarqulov.
