Aqtóbede medıtsına qyzmetkerleri men polıtseıler baspanaly boldy
AQTÓBE. QazAqparat – Aqtóbede pandemııa kezinde jumys istep júrgen polıtsııa qyzmetkerleri men medıtsına mamandary páter aldy, dep habarlaıdy QazAqparat tilshisi.
Oblys ákimi Ońdasyn Orazalın medıtsına salasynyń jáne quqyq qorǵaý organdarynyń qyzmetkerlerine «Nur Aqtóbe» shaǵyn aýdanyndaǵy jańa turǵyn úıden páter kiltin tabystady. Sharaǵa birneshe aı boıy koronavırýs ınfektsııasymen kúreste aldyńǵy qatardan tabylyp, aıtarlyqtaı úles qosqan densaýlyq saqtaý jáne ishki ister organdarynyń ókilderi qatysty.
«Elimiz úshin qıyn kezeńde sizder óz densaýlyǵyńyzǵa tónetin qaterlerge táýekel ete otyryp, otbasydan jyraqta júrip, qyzmet etesizder, adamdardyń ómiri men bizdiń tynyshtyǵymyzdy saqtap júrsizder. Barlyq aımaq turǵyndarynyń atynan sizderdiń adal eńbekterińiz úshin alǵys aıtamyn», - dedi Ońdasyn Orazalın.
«Nur Aqtóbe» yqsham aýdanyndaǵy bir bólmeli páter 2 paıyzdyq ústemeaqymen berildi. Arendalyq páterge ıe bolǵandar keıin satyp ala alady. Baspanaly bolǵandar arasynda oblystyq balalar dáriger-gematology Dámetken Erǵarınova, Aqtóbe medıtsınalyq ortalyǵynyń dárigeri Áıgerim Túktibaeva jáne medbıke Gúljan Dúısenqulova bar. Ýchastkelik polıtsııa ınspektorlary Meırambek Jolmaǵambetov, Dastan Sultanǵalıev, Aleksandr Bakshanov, Ardaq Myńjasarov, Rýslan Naýryzbaev ta páter aldy.
Aıta keteıik, «Nurly jer» baǵdarlamasy aıasynda 2017 jyldan bastap «Nur Aqtóbe» shaǵyn aýdanynda 4634 páter berildi. Munda negizinen bıýdjet salasynyń qyzmetkerleri turady.
